اسلامی جمہوریہ ایران گزشتہ ماہ کے آخر میں مشرق وسطیٰ میں جنگ چھڑنے کے بعد سے اپنے خلیجی پڑوسی ممالک پر حملے کر رہا ہے، جس کی وجہ سے کمرشل فضائی سفر متاثر ہوا ہے اور عالمی سطح پر توانائی کی سپلائی میں رکاوٹیں پیدا ہوئی ہیں۔

دوحہ میں منگل کو اے ایف پی کے صحافی نے کئی دھماکوں کی آوازیں سنیں، اس سے ایک روز قبل بھی قطری دارالحکومت میں اسی نوعیت کے دھماکے سنے گئے تھے۔ قطر سمیت کئی دیگر خلیجی ممالک کو حالیہ دنوں میں ڈرون اور میزائل حملوں کا نشانہ بنایا گیا ہے۔

قطر کی وزارت دفاع نے ایکس پر اپنی پوسٹ میں بتایا کہ ریاست قطر کی مسلح افواج نے اس میزائل حملے کو فضا میں ہی تباہ کر دیا جس میں قطر کو نشانہ بنانے کی کوشش کی گئی تھی۔

قریبی ریاست دبئی میں بھی اے ایف پی کے صحافی نے 3 دھماکوں کی آوازیں سنیں، جس سے قبل موبائل فون الرٹس کے ذریعے متحدہ عرب امارات کے اس گنجان آباد شہر کے رہائشیوں کو ممکنہ میزائل خطرات کے پیش نظر فوری طور پر محفوظ مقامات پر منتقل ہونے کی وارننگ دی گئی تھی۔

ایران نے مشرق وسطیٰ کی جنگ کے آغاز سے اب تک متحدہ عرب امارات پر 1900 سے زائد میزائل اور ڈرون فائر کیے ہیں، جو تہران کی جانب سے نشانہ بنائے گئے کسی بھی دوسرے ملک کے مقابلے میں سب سے زیادہ تعداد ہے۔

تہران نے خلیجی ممالک میں موجود امریکی تنصیبات کے ساتھ ساتھ سویلین انفرااسٹرکچر بشمول اہم عمارات، ہوائی اڈوں، بندرگاہوں اور تیل کی تنصیبات کو نشانہ بنایا ہے۔

ایرانی وزیر خارجہ عباس عراقچی نے رواں ہفتے کہا تھا کہ مشرق وسطیٰ میں قائم امریکی اڈوں کو فضائی حملوں کے لیے استعمال کیا گیا اور ایران کے جزیرہ خارک پر حملے کے لیے متحدہ عرب امارات سے میزائل فائر کیے گئے، تاہم اماراتی حکام نے ان دعووں کی تردید کی ہے۔

متحدہ عرب امارات کے فضائی دفاعی نظام کی جانب سے زیادہ تر میزائلوں کو فضا میں ہی تباہ کیے جانے کے باوجود ان حملوں نے اس مالیاتی مرکز میں سفری منصوبوں کو درہم برہم کر دیا ہے۔