صنعتی حکام کے مطابق آبنائے ہرمز کے راستے گیس کی ترسیل تقریباً رک جانے اور دنیا کے دوسرے بڑے برآمد کنندہ قطر کی جانب سے برآمدات معطل ہونے کے بعد ایشیا میں اسپاٹ ایل این جی کی قیمتیں تین سال کی بلند ترین سطح تک پہنچ گئی ہیں اور چار سال کے دوران یہ سپلائی کا دوسرا بڑا جھٹکا ہے۔

جنوبی ایشیا میں بنگلہ دیش نے مارچ کے دوران کوئلے سے بجلی کی پیداوار اور کوئلے سے چلنے والی بجلی کی درآمدات میں اضافہ کیا ہے۔ پاکستان بھی مقامی ذرائع سے بجلی کی پیداوار بڑھانے کا منصوبہ رکھتا ہے۔ وفاقی وزیر توانائی اویس لغاری کے مطابق ایل این جی سے بجلی کی پیداوار کم ہونے کے بعد مقامی کوئلے سے چلنے والے بجلی گھر غیر مصروف اوقات میں زیادہ بجلی پیدا کر سکیں گے۔

جنوب مشرقی ایشیا میں فلپائن کوئلے سے بجلی کی پیداوار بڑھا رہا ہے اور ایل این جی سے پیداوار کم کر رہا ہے، جبکہ ویتنام کی بجلی کمپنی ای وی این کوئلے کی سپلائی کے معاہدوں پر مذاکرات کر رہی ہے۔ تھائی لینڈ بھی ایل این جی بچانے کے لیے اپنے سب سے بڑے کوئلے کے بجلی گھر کی پیداوار بڑھا رہا ہے۔

جنوبی کوریا نے کوئلے سے بجلی کی پیداوار کی حد ختم کرنے اور جوہری توانائی کی پیداوار بڑھانے کا منصوبہ بنایا ہے، جبکہ جاپان کی بڑی یوٹیلٹی کمپنی جیرا بھی کوئلے کے بجلی گھروں کو زیادہ استعمال میں رکھنے کا ارادہ رکھتی ہے۔

اعداد و شمار کے مطابق گزشتہ ایک دہائی سے ایشیا میں بجلی کی پیداوار میں قدرتی گیس کا حصہ کم ہو رہا ہے کیونکہ قابل تجدید توانائی کا استعمال بڑھ رہا ہے۔ ماہرین کا کہنا ہے کہ جنگ کے باعث سپلائی میں رکاوٹوں سے ایشیا میں ایل این جی کی طلب مزید کم ہو سکتی ہے اور قیمتیں بحران کے بعد بھی بلند اور غیر مستحکم رہنے کا امکان ہے۔

ماہرین کے مطابق بڑھتی ہوئی درآمدی لاگت قابل تجدید توانائی کی جانب منتقلی کے لیے مزید دلیل فراہم کرتی ہے کیونکہ درآمدی ایندھن پر انحصار توانائی کے شعبے کے لیے خطرات پیدا کرتا ہے۔