امریکہ اور اسرائیل کی ایران کے خلاف جاری جنگ تیسرے ہفتے میں داخل ہو چکی ہے جس نے پورے مشرق وسطیٰ میں ہلچل پیدا کر دی ہے اور عالمی توانائی منڈیوں کو متاثر کیا ہے۔ ٹرمپ نے اتوار کو کہا تھا کہ وہ ممالک جو خلیج سے تیل پر زیادہ انحصار کرتے ہیں ان کی ذمہ داری ہے کہ وہ اس آبنائے کی حفاظت کریں جس سے دنیا کی تقریباً 20 فیصد تیل گزرتا ہے۔

ایشیا کی منڈیوں نے اس صورتحال پر محتاط ردعمل ظاہر کیا۔ برینٹ خام تیل کی قیمت ایک فیصد سے زیادہ بڑھ کر 104.50 ڈالر فی بیرل سے تجاوز کر گئی جبکہ خطے کی اسٹاک مارکیٹوں میں زیادہ تر کمی دیکھی گئی۔ سرمایہ کاروں کو مشرق وسطیٰ کے تیل کے تنصیبات کو لاحق خطرات اور اتحادی ممالک سے ٹرمپ کی بڑھتی ہوئی توقعات پر تشویش ہے۔

جاپان کی وزیر اعظم سانے تاکائیچی نے پارلیمان کو بتایا کہ جاپان کا آئین جنگ سے دستبرداری کی پالیسی پر مبنی ہے اس لیے اس نے مشرق وسطیٰ میں جہازوں کی حفاظت کے لیے بحری جہاز بھیجنے کا کوئی فیصلہ نہیں کیا۔ انہوں نے کہا کہ جاپان قانونی دائرے میں رہتے ہوئے ممکنہ اقدامات کا جائزہ لے رہا ہے۔

ادھر آسٹریلیا نے بھی کہا کہ اسے اس مشن کے لیے کوئی باضابطہ درخواست موصول نہیں ہوئی اور وہ اس آپریشن میں حصہ نہیں لے گا۔

ادھر ایران جنگ کے باعث عالمی فضائی سفر بھی شدید متاثر ہوا ہے۔ دبئی، دوحہ اور ابوظہبی جیسے بڑے فضائی مراکز میں پابندیوں کی وجہ سے ہزاروں پروازیں منسوخ ہو چکی ہیں اور بڑی تعداد میں مسافر پھنس گئے ہیں۔

اسی دوران دبئی حکام نے ڈرون حملے کے بعد ایئرپورٹ کے قریب ایندھن کے ٹینک میں لگنے والی آگ پر قابو پانے کی تصدیق کی ہے جبکہ سعودی عرب نے مشرقی علاقے میں ایک گھنٹے کے اندر 34 ڈرون مار گرانے کا دعویٰ کیا ہے۔ ان واقعات میں کسی جانی نقصان کی اطلاع نہیں ملی۔

ایرانی وزیر خارجہ عباس عراقچی نے کہا ہے کہ ایران نے نہ جنگ بندی کی درخواست کی ہے اور نہ ہی مذاکرات کی، اور وہ ضرورت پڑنے تک اپنا دفاع جاری رکھنے کے لیے تیار ہے۔