یہ آپریشن لکی مروت میں رسول خیل چیک پوسٹ کے قریب جمعہ کو پولیس کی گاڑی پر ہونے والے ایک دھماکے کے بعد کیا گیا جس کے نتیجے میں ایس ایچ او سمیت چھ اہلکار شہید اور ایک زخمی ہوگئے تھے۔

وزیرِ اعظم شہباز شریف نے شاگئی، لکی مروت میں فتنہ الخوارج کے خلاف کامیاب آپریشن پر سی ٹی ڈی کے افسران و اہلکاروں کی پزیرائی کی ہے۔

وزیرِاعظم نے آپریشن میں 6 خارجیوں کو جہنم رسید کرنے پر سی ٹی ڈی کے افسران و اہلکاروں کی پیشہ ورانہ صلاحیتوں کی تعریف کی۔

وزیرِاعظم نے کہا کہ دہشتگردی کی عفریت کے ملک سے مکمل خاتمے تک اس کے خلاف جنگ جاری رکھی جائے گی۔

انہوں نے مزید کہا کہ سی ٹی ڈی سمیت تمام قانون نافذ کرنے والے اداروں کے افسران اور اہلکار دن رات ارض وطن کو دہشتگردوں سے پاک کرنے میں مصروف عمل ہیں، جس پر پوری قوم کو ان پر فخر ہے۔

وزیرِ اعظم شہباز شریف نے واضح کیا کہ وہ خود سمیت پوری قوم سکیورٹی فورسز اور قانون نافذ کرنے والے اداروں کے دہشتگردی کے خاتمے کے عزم میں ان کے شانہ بشانہ کھڑی ہے۔

وفاقی وزیر داخلہ محسن نقوی نے بھی شاگئی لکی مروت میں خوارجیوں کے خلاف کامیاب آپریشن پر سی ٹی ڈی خیبرپختونخوا کی کارکردگی کو سراہا ہے۔

انہوں نے کہا کہ سی ٹی ڈی خیبرپختونخوا نے فتنہ الخوارج کے 6 دہشتگردوں کو جہنم واصل کرکے ان کے مذموم عزائم کو ناکام بنایا۔

محسن نقوی نے سی ٹی ڈی خیبرپختونخوا کی پیشہ وارانہ صلاحیتوں اور جرات کو خراجِ تحسین پیش کرتے ہوئے کہا کہ فتنہ الخوارج کے دہشتگردوں کے خلاف کامیاب آپریشن پر سی ٹی ڈی کے بہادر سپوتوں کو سلام پیش کرتا ہوں۔

وفاقی وزیر داخلہ کا کہنا تھا کہ سی ٹی ڈی خیبرپختونخوا کے جوانوں کی بہادری اور پروفیشنل ازم پر فخر ہے جبکہ خیبرپختونخوا میں قیام امن کیلئے سی ٹی ڈی کی کارروائیاں قابلِ تحسین ہیں۔