انہوں نے کہا کہ جب بین الاقوامی قوانین کی خلاف ورزی کی جاتی ہے تو امن خطرے میں پڑ جاتا ہے۔ پاکستان دشمنی کے فوری خاتمے اور مذاکرات کی میز پر واپسی کا مطالبہ کرتا ہے۔

عاصم افتخار نے افسوس کا اظہار کیا کہ خطے کو درپیش سنگین خطرات کے باوجود سلامتی کونسل اس تنازع کو ختم کرنے کے لیے متحد نہ ہو سکی۔

پاکستانی مندوب نے بحرین، کویت، عمان، قطر، سعودی عرب، متحدہ عرب امارات اور اردن کی علاقائی سالمیت اور خودمختاری کی مکمل حمایت کا اعادہ کیا۔ انہوں نے ان ممالک پر ہونے والے غیر ضروری حملوں خاص طور پر شہریوں اور بنیادی ڈھانچے کو نشانہ بنانے کی سخت مذمت کی۔ انہوں نے امید ظاہر کی کہ ان ممالک پر حملے فوری طور پر بند ہوں گے اور آبنائے ہرمز میں جہاز رانی کی آزادی برقرار رہے گی۔

عاصم افتخار نے 28 فروری کو ایران پر ہونے والے حملوں کی بھی مذمت کی اور کہا کہ پاکستان ایران کی خودمختاری اور علاقائی سالمیت کا حامی ہے اور وہاں کی عدم استحکام کی صورتحال پر فکر مند ہے۔

انہوں نے بتایا کہ اس تنازع کے سماجی و معاشی اثرات سے پاکستان بھی متاثر ہوا ہے، متحدہ عرب امارات میں حملوں کے دوران دو پاکستانی جان بحق ہوئے، جبکہ لاکھوں پاکستانی خلیجی ممالک میں خطرے کی زد میں ہیں۔ ایندھن کی فراہمی میں رکاوٹ کے باعث حکومتِ پاکستان کو تیل اور بجلی کی بچت کے لیے ہنگامی اقدامات کرنے پڑے۔

پاکستان نے زور دیا کہ اقوام متحدہ کے چارٹر سے باہر طاقت کا استعمال غیر قانونی ہے اور تمام فریقین بین الاقوامی انسانی حقوق کے قوانین کی پاسداری کریں۔ انہوں نے کہا کہ خطے کا کوئی ایک ملک اپنی من مانی نہیں کر سکتا اور نہ ہی پڑوسیوں کو دھمکا کر اپنی مرضی مسلط کر سکتا ہے۔ پاکستان نے تمام فریقین سے فوری جنگ بندی، تحمل اور سفارت کاری کے ذریعے دیرپا حل تلاش کرنے کی اپیل کی ہے۔