خبر رساں ادارے کے مطابق مقبوضہ یروشلم کے اوپر دھماکوں کی آوازیں سنی گئیں۔ اسرائیلی فوج نے کہا کہ ایران کی جانب سے داغے گئے میزائلوں کے بعد فضائی دفاعی نظام متحرک کیا گیا۔ اسی دوران متحدہ عرب امارات کے شہر دبئی کے وسطی علاقے میں بھی زور دار دھماکے سنے گئے، جس کے بارے میں عینی شاہدین نے بتایا کہ ان میں سے ایک دھماکہ انتہائی شدید تھا۔ یہ واقعات ایسے وقت میں پیش آئے جب ایران امریکی اور اسرائیلی حملوں کے جواب میں خلیجی ممالک کو بھی نشانہ بنا رہا ہے۔

عالمی منڈی میں تیل کی قیمتوں میں تیزی دیکھنے میں آئی اور برینٹ خام تیل کی قیمت دوبارہ 100 ڈالر فی بیرل سے تجاوز کر گئی۔ ایران کی جانب سے مشرق وسطیٰ میں تیل کی تنصیبات اور رسد کو نشانہ بنانے کی کوششوں کے باعث سرمایہ کاروں میں تشویش بڑھ گئی، جس کے نتیجے میں عالمی اسٹاک مارکیٹوں میں بھی مندی دیکھی گئی۔ اس صورتحال کے پیش نظر انٹرنیشنل انرجی ایجنسی کے رکن ممالک نے اسٹریٹجک ذخائر سے ریکارڈ مقدار میں تیل جاری کرنے کا فیصلہ کیا ہے۔ امریکا نے اعلان کیا ہے کہ وہ اپنے اسٹریٹجک پیٹرولیم ریزرو سے 172 ملین بیرل تیل جاری کرے گا، جبکہ مجموعی طور پر 32 ممالک تقریباً 400 ملین بیرل تیل مارکیٹ میں فراہم کریں گے۔

دریں اثنا عراق کے کردستان کے شہر اربیل میں واقع ایک اطالوی فوجی اڈے پر بھی حملہ کیا گیا۔ اطالوی وزیر خارجہ انتونیو تاجانی کے مطابق حملے میں کوئی جانی نقصان نہیں ہوا۔ اربیل میں تعینات اطالوی فوجی بین الاقوامی اتحاد کے تحت کرد سکیورٹی فورسز کو تربیت فراہم کر رہے ہیں۔

لبنان کے دارالحکومت بیروت کے ساحلی علاقے پر اسرائیلی فضائی حملے میں کم از کم سات افراد جاں بحق اور 21 زخمی ہوگئے۔ لبنانی وزارت صحت کے مطابق حملہ ایسے مقام پر کیا گیا جہاں بے گھر افراد کھلے آسمان تلے پناہ لیے ہوئے تھے۔

خلیج میں سمندری راستوں پر بھی کشیدگی برقرار ہے۔ متحدہ عرب امارات کے ساحل کے قریب ایک کنٹینر جہاز پر نامعلوم پروجیکٹائل گرنے سے جہاز میں آگ لگ گئی تاہم عملہ محفوظ رہا۔ اس کے علاوہ آبنائے ہرمز میں حملے کا نشانہ بننے والے ایک تھائی بلک کیریئر کے عملے کے تین ارکان اب تک لاپتا ہیں۔ عراقی ساحل کے قریب دو آئل ٹینکروں پر بھی حملے کیے گئے جن میں کم از کم ایک شخص ہلاک اور متعدد لاپتا ہوگئے جبکہ 38 افراد کو بچا لیا گیا۔

سعودی عرب کی وزارت دفاع کے مطابق ملک کے جنوب مشرق میں واقع شیبہ آئل فیلڈ کی جانب آنے والے دو ڈرونز کو تباہ کر دیا گیا۔ اس سے قبل ایک ڈرون کو سفارتخانوں کے علاقے کے قریب اور ایک کو مشرقی خطے میں مار گرایا گیا تھا۔ کویت نے بھی متعدد ڈرونز تباہ کرنے کا دعویٰ کیا جبکہ ایک رہائشی عمارت میں آگ لگنے سے دو افراد زخمی ہوگئے۔ بحرین نے محرق گورنریٹ میں ایندھن کے ذخائر پر حملے کے بعد شہریوں کو گھروں میں رہنے کی ہدایت جاری کی۔

ادھر شمالی عراق میں ایک فوجی اڈے پر فضائی حملے میں کم از کم دو جنگجو ہلاک ہوگئے۔ دوسری جانب امریکی صدر ڈونلڈ ٹرمپ نے دعویٰ کیا کہ ایران جنگ میں شکست کے قریب ہے اور امریکی حملوں نے پہلے ہی اسلامی جمہوریہ کو کمزور کر دیا ہے۔ تاہم ایران کے سپریم لیڈر کے سینئر فوجی مشیر یحییٰ رحیم صفوی نے ٹرمپ پر شدید تنقید کرتے ہوئے انہیں انتہائی بدعنوان اور احمق امریکی صدر قرار دیا۔

امریکی محکمہ دفاع کے حکام نے کانگریس کو بریفنگ میں بتایا کہ ایران کے خلاف جنگ کے ابتدائی چھ دنوں میں امریکی فوجی اخراجات 11.3 ارب ڈالر سے تجاوز کر چکے ہیں، جس سے اس تنازع کے مالی اور معاشی اثرات مزید نمایاں ہو رہے ہیں۔

مشرق وسطیٰ میں بڑھتی ہوئی کشیدگی نے عالمی توانائی منڈیوں، بحری تجارت اور خطے کی سلامتی کے حوالے سے خدشات میں نمایاں اضافہ کر دیا ہے۔