اسپاٹ گولڈ 0.1 فیصد کمی کے ساتھ 5,172.86 ڈالر فی اونس پر آ گیا، جبکہ اپریل کے لیے امریکی گولڈ فیوچرز تقریباً بغیر تبدیلی کے 5,178 ڈالر فی اونس پر برقرار رہے۔ ماہرین کے مطابق موجودہ حالات میں سونے کی قیمت میں کمی کو سرمایہ کار خریداری کے موقع کے طور پر دیکھ سکتے ہیں۔

تجزیہ کار نکولس فراپل کے مطابق مشرق وسطیٰ میں جاری تنازع اور آبنائے ہرمز کی عملی بندش کے باعث سونے کی فروخت کے لیے مارکیٹ میں کوئی واضح وجہ موجود نہیں، اس لیے قیمتوں میں کمی آنے پر خریدار متحرک ہو سکتے ہیں۔

دوسری جانب امریکی ڈالر میں 0.1 فیصد اضافہ ہوا، جس کے باعث ڈالر میں قیمت رکھنے والی قیمتی دھاتیں دیگر کرنسیوں کے حامل سرمایہ کاروں کے لیے مہنگی ہو گئیں۔

ایران نے خبردار کیا ہے کہ موجودہ صورتحال میں خام تیل کی قیمت 200 ڈالر فی بیرل تک پہنچ سکتی ہے۔ اس کی فوج نے بدھ کو تجارتی جہازوں کو نشانہ بنایا جبکہ عالمی توانائی ایجنسی نے تیل کی قیمتوں میں شدید اضافے کو روکنے کے لیے اسٹریٹجک ذخائر سے بڑی مقدار میں تیل جاری کرنے کی اپیل کی ہے۔

اطلاعات کے مطابق ایران نے آبنائے ہرمز میں بارودی سرنگیں بھی نصب کی ہیں جس سے اس اہم آبی گزرگاہ کو دوبارہ کھولنے کی کوششیں مزید پیچیدہ ہو سکتی ہیں۔ کئی آئل ٹینکر ایک ہفتے سے زائد عرصے سے اس راستے میں پھنسے ہوئے ہیں جبکہ ذخیرہ کرنے کی گنجائش کم ہونے کے باعث بعض پیداوار کنندگان نے پیداوار بھی معطل کر دی ہے۔

امریکہ میں مہنگائی کے تازہ اعداد و شمار کے مطابق فروری میں صارف قیمت اشاریہ 0.3 فیصد بڑھا جبکہ سالانہ بنیاد پر یہ اضافہ 2.4 فیصد رہا۔ سرمایہ کار اب جمعہ کو جاری ہونے والے پرسنل کنزمپشن ایکسپینڈیچر انڈیکس کے منتظر ہیں۔

دیگر قیمتی دھاتوں میں چاندی کی قیمت 0.3 فیصد کمی کے ساتھ 85.49 ڈالر فی اونس رہی، جبکہ پلاٹینم 0.1 فیصد اضافے کے ساتھ 2,171.19 ڈالر اور پیلیڈیم 0.8 فیصد بڑھ کر 1,650.52 ڈالر فی اونس ہو گیا۔