ناہید رانا نے صرف 24 رنز دے کر 5 کھلاڑیوں کو آؤٹ کیا، جس کی بدولت پاکستان کی پوری ٹیم محض 114 رنز پر ڈھیر ہو گئی۔ بنگلہ دیش نے یہ ہدف صرف 15.1 اوورز میں حاصل کر کے تین میچوں کی سیریز میں 1-0 کی برتری حاصل کر لی۔

بنگلہ دیشی اوپنر تنزید حسن نے جارحانہ بیٹنگ کرتے ہوئے 42 گیندوں پر 67 رنز کی ناقابلِ شکست اننگز کھیلی۔ اس سے قبل ناہید رانا نے اپنے 7 اوورز کے اسپیل میں تباہ کن باؤلنگ کی اور پاکستان کو بنگلہ دیش کے خلاف اس کے اب تک کے کم ترین ون ڈے اسکور (114 رنز) پر محدود کر دیا, اس سے قبل پاکستان کا کم ترین اسکور 1999 کے ورلڈ کپ میں 161 رنز تھا۔

23 سالہ ناہید رانا ون ڈے کرکٹ کی تاریخ میں پہلے بنگلہ دیشی باؤلر بن گئے ہیں جنہوں نے کسی بھی ٹیم کے ٹاپ 5 بلے بازوں کو آؤٹ کیا۔ انہوں نے صاحبزادہ فرحان، شامل حسین، معاذ صداقت، محمد رضوان اور سلمان علی آغا کی وکٹیں حاصل کیں۔ کپتان مہدی حسن معراج نے بھی 29 رنز دے کر 3 کھلاڑیوں کو آؤٹ کر کے ناہید کا بھرپور ساتھ دیا۔اسی طرح مستفیض احمد اور تسکین احمد نے ایک ایک وکٹ لی۔ پاکستان کی جانب سے فہیم اشرف نے 37 رنز بنا کر کچھ مزاحمت کی لیکن پوری ٹیم 30.4 اوورز میں آؤٹ ہو گئی۔

ناہید رانا اب مستفیض احمد کے بعد دوسرے بنگلہ دیشی باؤلر ہیں جنہوں نے پاکستان کے خلاف ون ڈے میچ میں پانچ وکٹیں لینے کا اعزاز حاصل کیا ہے۔