ٹرمپ نے سوشل میڈیا پر جاری بیان میں کہا کہ انہیں ابھی تک اس بات کی کوئی حتمی رپورٹ موصول نہیں ہوئی کہ ایران نے واقعی آبنائے ہرمز میں بارودی سرنگیں نصب کی ہیں، تاہم اگر ایسا کیا گیا ہے تو تہران کو انہیں فوری طور پر ہٹانا ہوگا۔ ان کا کہنا تھا کہ اگر کسی بھی وجہ سے سرنگیں بچھائی گئی ہیں اور انہیں فوراً نہ ہٹایا گیا تو ایران کو ایسی فوجی کارروائی کا سامنا کرنا پڑے گا جیسی پہلے کبھی نہیں دیکھی گئی۔

امریکی صدر نے یہ بھی کہا کہ اگر ایران ممکنہ طور پر بچھائی گئی سرنگوں کو ہٹا دیتا ہے تو یہ درست سمت میں ایک بڑا قدم ہوگا۔ انہوں نے مزید کہا کہ امریکہ ان میزائلوں کو بھی استعمال کر سکتا ہے جنہیں ماضی میں لاطینی امریکا کے پانیوں میں مبینہ منشیات اسمگلنگ میں ملوث کشتیوں کو تباہ کرنے کے لیے استعمال کیا گیا تھا، تاکہ آبنائے ہرمز میں بارودی سرنگیں بچھانے والی کسی بھی کشتی کو مستقل طور پر ختم کیا جا سکے۔

امریکی نشریاتی ادارے سی این این نے انٹیلی جنس ذرائع کے حوالے سے رپورٹ کیا ہے کہ ایران نے واقعی آبنائے ہرمز میں بارودی سرنگیں بچھانا شروع کر دی ہیں، جس کے باعث عالمی تیل کی ترسیل متاثر ہونے کا خدشہ بڑھ گیا ہے۔ وائٹ ہاؤس نے اس دوران کہا ہے کہ امریکہ نے اب تک کسی آئل ٹینکر کو اس گزرگاہ سے اسکورٹ نہیں کیا۔