قوم سے خطاب میں وزیرِ اعظم نے کہا کہ سرکاری دفاتر ہفتے میں صرف چار دن کام کریں گے جبکہ ایندھن کی بچت کے لیے ایک اضافی تعطیل دی جائے گی۔ انہوں نے بتایا کہ سرکاری دفاتر کے 50 فیصد ملازمین گھر سے کام کریں گے جبکہ آئندہ ہفتے سے اسکول دو ہفتوں کے لیے بند رہیں گے۔ تاہم بینک معمول کے مطابق کھلے رہیں گے۔

وزیرِ اعظم کے مطابق صورتحال کا جائزہ لینے کے لیے دن کے اوائل میں ایک اجلاس منعقد ہوا جس میں مختلف کفایت شعاری اقدامات پر غور کے بعد ان کی منظوری دی گئی۔

انہوں نے بتایا کہ آئندہ دو ماہ کے لیے سرکاری گاڑیوں کے ایندھن الاؤنس میں 50 فیصد کمی کی جائے گی، تاہم ایمبولینسز اس پابندی سے مستثنیٰ ہوں گی۔ اس کے علاوہ ایندھن کے استعمال میں کمی کے لیے 60 فیصد سرکاری گاڑیاں دو ماہ تک سڑکوں پر نہیں آئیں گی۔

وزیرِ اعظم نے اعلان کیا کہ وفاقی کابینہ آئندہ دو ماہ تک اپنی تنخواہیں نہیں لے گی جبکہ ارکانِ پارلیمنٹ کی تنخواہوں میں 50 فیصد کمی کی جائے گی۔ اس کے علاوہ گریڈ 20 اور اس سے اوپر کے وہ سرکاری افسران جن کی ماہانہ تنخواہ تین لاکھ روپے سے زائد ہے، عوامی فلاح کے لیے دو دن کی تنخواہ عطیہ کریں گے۔

انہوں نے مزید بتایا کہ سرکاری محکموں کے اخراجات میں 20 فیصد کمی کی جائے گی جبکہ سرکاری اداروں کے لیے گاڑیوں، فرنیچر اور ایئرکنڈیشنرز کی خریداری پر پابندی عائد کر دی گئی ہے۔

وزیرِ اعظم نے وزرا، مشیروں اور سرکاری افسران کے غیر ملکی دوروں پر بھی پابندی کا اعلان کیا، سوائے ان دوروں کے جو قومی مفاد کے لیے ناگزیر ہوں۔

انہوں نے کہا کہ ایندھن کی بچت کے لیے ٹیلی کانفرنسنگ اور آن لائن اجلاسوں کو ترجیح دی جائے گی جبکہ کفایت شعاری مہم کے تحت سرکاری عشائیوں اور افطار پارٹیوں پر بھی پابندی لگا دی گئی ہے۔

وزیرِ اعظم کے مطابق ان اقدامات کا مقصد بدلتی ہوئی علاقائی صورتحال کے دوران وسائل کے محتاط استعمال کو یقینی بنانا اور ملکی معاشی استحکام برقرار رکھنا ہے۔