اسپاٹ گولڈ کی قیمت 1.7 فیصد کمی کے ساتھ 5,082.51 ڈالر فی اونس تک آ گئی۔ اسی طرح اپریل ڈیلیوری کے لیے امریکی گولڈ فیوچرز بھی 1.4 فیصد کمی کے ساتھ 5,099.40 ڈالر فی اونس پر ٹریڈ کرتے رہے۔

امریکی ڈالر تین ماہ سے زائد کی بلند ترین سطح پر پہنچ گیا جس کے باعث دیگر کرنسیوں کے حامل سرمایہ کاروں کے لیے سونا خریدنا مہنگا ہو گیا۔ اس کے علاوہ امریکا کے 10 سالہ ٹریژری بانڈز کی ییلڈ بھی ایک ماہ کی بلند ترین سطح تک پہنچ گئی ہے جس سے بغیر منافع دینے والے اثاثے جیسے سونے کو رکھنے کی لاگت بڑھ جاتی ہے۔

کے سی ایم ٹریڈ کے چیف مارکیٹ تجزیہ کار ٹم واٹرر کے مطابق عالمی منڈی میں شدید اتار چڑھاؤ کے باوجود سونا دباؤ کا شکار ہے کیونکہ تین ہندسوں میں پہنچنے والی تیل کی قیمتوں نے مہنگائی کے خدشات بڑھا دیے ہیں اور اس کے نتیجے میں شرح سود میں کمی کی توقعات کم ہو رہی ہیں۔

دوسری جانب امریکا، اسرائیل اور ایران کے درمیان بڑھتی ہوئی جنگ کے باعث خام تیل کی قیمتیں 20 فیصد سے زیادہ بڑھ کر 110 ڈالر فی بیرل سے اوپر پہنچ گئی ہیں۔ مشرق وسطیٰ کے کچھ بڑے تیل پیدا کرنے والے ممالک نے سپلائی میں کمی کر دی ہے جبکہ آبنائے ہرمز کے ذریعے ترسیل میں طویل رکاوٹوں کا خدشہ بھی موجود ہے۔

ماہرین کا کہنا ہے کہ گزشتہ ایک سال کے دوران سونے کی قیمتوں میں اضافے کی بڑی وجہ امریکا میں شرح سود میں ممکنہ نرمی کی توقعات تھیں، تاہم تیل کی قیمتیں 100 ڈالر فی بیرل سے اوپر جانے کے بعد مہنگائی کا خطرہ بڑھ گیا ہے جس سے شرح سود میں کمی یقینی نہیں رہی۔

سرمایہ کاروں کو توقع ہے کہ امریکی فیڈرل ریزرو 18 مارچ کو ہونے والے دو روزہ اجلاس کے اختتام پر شرح سود برقرار رکھے گا۔ سی ایم ای گروپ کے فیڈ واچ ٹول کے مطابق جون میں بھی شرح سود برقرار رہنے کے امکانات بڑھ کر 51 فیصد سے زیادہ ہو گئے ہیں جبکہ گزشتہ ہفتے یہ امکان 43 فیصد سے کم تھا۔

دریں اثنا مشرق وسطیٰ میں بڑھتی ہوئی کشیدگی کے دوران ایران نے مجتبیٰ خامنہ ای کو ان کے والد علی خامنہ ای کا جانشین نامزد کر دیا ہے جس سے یہ اشارہ ملا ہے کہ تہران میں سخت گیر قیادت بدستور اقتدار میں رہے گی۔

دوسری قیمتی دھاتوں میں بھی کمی ریکارڈ کی گئی۔ اسپاٹ چاندی 2.2 فیصد کمی کے ساتھ 82.50 ڈالر فی اونس پر آ گئی جبکہ پلاٹینم 2.8 فیصد گر کر 2,076.07 ڈالر فی اونس اور پیلیڈیم 1.2 فیصد کمی کے ساتھ 1,605.12 ڈالر فی اونس رہ گیا۔