اجلاس کے دوران پنجاب میں پیٹرولیم مصنوعات کی طلب، رسد اور دستیاب ذخائر کا معائنہ کیا گیا۔ شرکاء نے بدلتی ہوئی عالمی صورتحال کے تناظر میں پیٹرولیم مصنوعات کی طلب اور رسد کے درمیان توازن برقرار رکھنے کے اقدامات پر تبادلہ خیال کیا۔ اجلاس میں پیٹرولیم کی طلب و رسد میں استحکام کے لیے ’ایندھن بچت پالیسی‘ اپنانے پر اتفاق کیا گیا۔

وزیراعلیٰ نے زرعی مقاصد کے لیے ڈیزل کی بلاتعطل فراہمی کو یقینی بنانے کی ضرورت پر زور دیا۔

مریم نواز نے ضلعی انتظامیہ کو پیٹرولیم مصنوعات کی فراہمی کی مسلسل نگرانی کرنے کی ہدایت کی اور ذخیرہ اندوزی کے خلاف سخت کریک ڈاؤن کا حکم دیا۔

انہوں نے پنجاب انفورسمنٹ اینڈ ریگولیٹری اتھارٹی اور محکمہ ٹرانسپورٹ کو صورتحال پر کڑی نظر رکھنے اور ضرورت پڑنے پر فوری کارروائی کی ہدایت کی۔

وزیراعلیٰ کا کہنا تھا کہ عوام کو پیٹرول پمپوں پر لمبی قطاروں میں کھڑا نہیں ہونا چاہیے اور صوبے میں کہیں بھی مقررہ سرکاری قیمتوں سے زائد پر فروخت کی اجازت نہیں دی جائے گی۔

انہوں نے مزید کہا کہ پوری قوم کو ابھرتے ہوئے چیلنجز کا سامنا کرنے کے لیے ہمت کا مظاہرہ کرنا ہوگا اور معاشی استحکام کے تحفظ کے لیے بروقت فیصلے ناگزیر ہیں۔ یہ پیش رفت وزیراعظم شہباز شریف کی ان ہدایات کے بعد سامنے آئی ہے جس میں انہوں نے وزیر پیٹرولیم کو صوبوں کا دورہ کرنے اور صوبائی حکومتوں کے تعاون سے ایندھن کی بچت اور بلاتعطل فراہمی کا منصوبہ تیار کرنے کا حکم دیا تھا۔

وزیراعظم نے 6 مارچ کو پیٹرولیم مصنوعات کی نقل و حمل کے لیے ایک ’ڈیش بورڈ‘ بنانے کی بھی ہدایت کی تھی، تاکہ صوبوں کے ساتھ ریئل ٹائم ڈیٹا شیئر کیا جا سکے اور ایندھن کی ترسیل کی نگرانی ممکن ہو سکے۔ اس سے قبل وزیراعلیٰ سندھ سید مراد علی شاہ اور وفاقی وزراء نے بھی کراچی میں ملاقات کی تھی، جس میں مشرقِ وسطیٰ میں بڑھتی ہوئی کشیدگی کے باعث عالمی منڈی میں خام تیل کی قیمتیں 120 ڈالر فی بیرل تک پہنچنے کے خدشے پر ہنگامی اقدامات اور بچت کی پالیسیوں پر غور کیا گیا تھا۔