خطے کے بیشتر فضائی راستے اب بھی میزائل اور ڈرون حملوں کے خطرات کے باعث بند ہیں، جس کی وجہ سے ہزاروں افراد کو نکالنے کے لیے مختلف ممالک چارٹر پروازوں اور محدود تجارتی پروازوں کے ذریعے انتظامات کر رہے ہیں۔ فرانس کے ٹرانسپورٹ وزیر فلپ تبارو کے مطابق متحدہ عرب امارات سے فرانسیسی شہریوں کو واپس لانے والی حکومت کی چارٹرڈ ایئر فرانس پرواز کو جمعرات کو علاقے میں میزائل فائرنگ کے باعث واپس موڑنا پڑا۔

ادھر برطانیہ کی عمان سے پہلی خصوصی پرواز جمعہ کی صبح لندن کے اسٹینسٹڈ ایئرپورٹ پہنچی، تاہم آپریشنل مسائل اور مسافروں کی بورڈنگ میں تاخیر کے باعث اس پرواز کو بھی دوبارہ شیڈول کرنا پڑا تھا۔

اتحاد ایئرویز نے اعلان کیا ہے کہ وہ 19 مارچ تک محدود پروازیں چلائے گی جو ابوظہبی سے لندن، پیرس، فرینکفرٹ، دہلی، نیویارک، ٹورنٹو اور تل ابیب سمیت تقریباً 70 مقامات تک جائیں گی۔ دوسری جانب دبئی ایئرپورٹ، جو عام طور پر دنیا کا مصروف ترین ہوائی اڈہ سمجھا جاتا ہے، وہاں پروازوں کی تعداد بدھ کے مقابلے میں تقریباً دوگنا تو ہوئی ہے مگر اب بھی معمول کے صرف 25 فیصد کے قریب ہے۔

ادھر بڑھتی کشیدگی کے باعث جیٹ فیول کی قیمتوں میں بھی غیر معمولی اضافہ ہوا ہے۔ سنگاپور میں جیٹ فیول کی قیمت اس ہفتے 225 ڈالر فی بیرل کی ریکارڈ سطح تک پہنچ گئی، جو بعد میں کچھ کمی کے بعد تقریباً 195 ڈالر فی بیرل رہ گئی، تاہم یہ گزشتہ ہفتے کے مقابلے میں اب بھی تقریباً دگنی ہے۔ اس صورتحال کے باعث عالمی ایئرلائنز کے اخراجات بڑھنے کا خدشہ پیدا ہو گیا ہے جبکہ ایشیائی ایئرلائنز کے شیئرز میں بھی کمی دیکھی گئی ہے۔

دوسری جانب مسافروں کو بھی شدید مشکلات کا سامنا ہے اور کئی افراد کو خطے سے نکلنے کے لیے بہت زیادہ رقم ادا کرنا پڑ رہی ہے۔ بعض مسافروں کے مطابق انہیں دبئی سے عمان جا کر پرواز پکڑنے کے لیے تقریباً 1500 پاؤنڈ ادا کرنا پڑے جبکہ کچھ افراد پہلے ہی ایمریٹس کی پروازوں کے لیے ہزاروں پاؤنڈ خرچ کر چکے ہیں۔ ماہرین کے مطابق اگر کشیدگی برقرار رہی تو عالمی فضائی سفر اور کارگو سروسز مزید متاثر ہو سکتی ہیں۔