مشرقِ وسطیٰ میں حالیہ کشیدگی، جہاں ایران اور لبنان تک حملوں کا دائرہ پھیل گیا ہے اور آبنائے ہرمز ایک بار پھر سرخیوں میں آ گئی ہے، اصولی طور پر منڈیوں میں روایتی انداز کی ’’سیف ہیون‘‘ کی طرف دوڑ پیدا کرنی چاہیے تھی۔

مگر منڈیاں اس کے بجائے ایک زیادہ پیچیدہ کہانی سنا رہی ہیں۔

سونے کی قیمت بڑھی ہے، مگر احتیاط کے ساتھ۔ ڈالر مضبوط ہوا ہے، مگر غیر ہموار انداز میں۔ روایتی محفوظ کرنسیاں پناہ گاہوں کے بجائے کسی غیر یقینی سفر کے مسافروں جیسا رویہ اختیار کیے ہوئے ہیں۔ اور اس سب کے پس منظر میں ایک بنیادی اور قدرے بے چین کر دینے والا سوال موجود ہے: آخر سرمایہ کار کس چیز سے بچاؤ کی حکمتِ عملی اختیار کر رہے ہیں؟

آغاز سونے سے کریں، جو مالیاتی دنیا میں سب سے قدیم محفوظ اثاثہ سمجھا جاتا ہے۔ اس ہفتے دھات کی قیمت میں دوبارہ اضافہ ہوا اور یہ فی اونس تقریباً 5,200 ڈالر کے قریب منڈلا رہی ہے، حالانکہ ہفتے کے آغاز میں شدید اتار چڑھاؤ کے باعث قیمتوں میں چار فیصد سے زیادہ کی کمی واقع ہوئی تھی۔ روزانہ کے چارٹ پر مجموعی رجحان بدستور واضح طور پر تیزی کا ہے۔

گزشتہ خزاں کے اواخر سے سونے کی قیمت ایک مضبوط اوپر جاتی سیڑھی کی صورت اختیار کر چکی ہے، جو تقریباً 4,200 ڈالر کے علاقے سے بڑھتے ہوئے موجودہ بلند سطح تک پہنچ گئی۔ تازہ جغرافیائی سیاسی جھٹکے کے بعد آنے والی شدید اتار چڑھاؤ والی کینڈلز بھی اس تیزی کے ڈھانچے کو توڑنے میں ناکام رہیں۔

تاہم خود بحران کے دوران سونے کا رویہ خاصا معنی خیز ہے۔ قیمتوں میں اچانک عمودی چھلانگ لگنے کے بجائے پہلے ہچکچاہٹ نظر آئی۔ ابتدائی ردعمل میں گھبراہٹ میں خریداری کے بجائے سخت نوعیت کی فروخت دیکھنے میں آئی۔

اسی شدید فروخت کے بعد منڈی نے خود کو سنبھالا اور قیمتیں دوبارہ بتدریج اوپر جانے لگیں۔ اس طرح کی قیمتوں کی حرکت کو تاجر عموماً ہجوم والی سرمایہ کاری سے جوڑتے ہیں، نہ کہ تحفظ کی بے تاب تلاش سے۔

یہ باریکی اہم ہے، کیونکہ سونا عموماً جغرافیائی سیاسی خطرات کے خلاف منڈی کا خالص ترین تحفظ سمجھا جاتا ہے۔ جب میزائل داغے جائیں تو عموماً سونا پہلے تیزی سے بڑھتا ہے اور سوالات بعد میں اٹھتے ہیں۔ اس حقیقت کہ قیمتیں پہلے گریں اور پھر سنبھلیں، اس بات کی طرف اشارہ کرتی ہے کہ سرمایہ کار بیک وقت کسی اور خطرے سے بھی بچاؤ کی کوشش کر رہے تھے۔

اس کا جواب اس وقت زیادہ واضح ہوتا ہے جب منظرنامے میں ڈالر کو شامل کیا جائے۔

امریکی ڈالر انڈیکس نے حیران کن طور پر مضبوط واپسی دکھائی ہے۔ سال کے آغاز میں 96 سے نیچے گرنے کے بعد یہ تیزی سے بڑھتے ہوئے 99 سے 100 کے دائرے کی طرف بڑھ گیا ہے۔ روزانہ کے چارٹ سے ظاہر ہوتا ہے کہ فروری کی نچلی سطح سے ایک فیصلہ کن اچھال آیا ہے اور اب قیمت نفسیاتی حد 100 کے قریب مزاحمتی سطحوں کے ایک جھرمٹ کی طرف دوبارہ بڑھ رہی ہے۔ عام حالات میں مشرقِ وسطیٰ میں ایسا تنازع جو تیل کی رسد کو خطرے میں ڈال دے، مہنگائی کے خدشات کو بڑھا کر اور امریکی شرحِ سود پر سوالات کھڑے کر کے ڈالر کو کمزور کرتا۔ مگر اس کے برعکس گرین بیک منڈی کی پسندیدہ پناہ گاہ بن گیا ہے۔

یہ تبدیلی عالمی لیکویڈیٹی کی سخت حقیقت کو ظاہر کرتی ہے۔ جب غیر یقینی صورتحال تیزی سے بڑھتی ہے تو سرمایہ کار لازماً سب سے نفیس ہیج کی تلاش نہیں کرتے، بلکہ سب سے زیادہ لیکویڈ آپشن کی طرف بڑھتے ہیں۔

ڈالر اب بھی دنیا میں سرمائے کا سب سے گہرا ذخیرہ ہے، اور دباؤ کے لمحات میں سرمایہ تقریباً خود بخود اسی میں سمٹنے لگتا ہے۔

تاہم اگر ڈالر ہی واحد پناہ گاہ ہوتا جہاں سرمایہ کا رخ ہو رہا ہے تو روایتی محفوظ کرنسیاں بھی اس کے ساتھ مضبوط ہونی چاہئیں۔ مگر ایسا نہیں ہو رہا۔

سوئس فرانک کو ہی دیکھ لیں۔ یوایس ڈالر/ سی ایچ ایف کا چارٹ جنوری کی کم ترین سطح، تقریباً 0.75، سے واضح بحالی دکھاتا ہے اور اب یہ جوڑا 0.78 سے 0.79 کے علاقے کی طرف بڑھ رہا ہے۔ سادہ الفاظ میں اس کا مطلب یہ ہے کہ فرانک مضبوط ہونے کے بجائے ڈالر کے مقابلے میں کمزور ہو رہا ہے۔ ایک ایسی کرنسی کے لیے جسے طویل عرصے سے یورپ کی حتمی محفوظ پناہ گاہ سمجھا جاتا رہا ہے، جغرافیائی سیاسی ہنگامہ آرائی کے دوران یہ ردعمل غیر معمولی ہے۔

جاپانی ین بھی تقریباً اسی انداز میں حرکت کر رہا ہے۔ یوایس ڈالر/جاپانی ین اس وقت اپنی کئی ماہ کی حد کے بالائی حصے کے قریب، تقریباً 157 کی سطح کے آس پاس ٹریڈ کر رہا ہے۔

چارٹ میں بار بار اوپر جانے کی کوششیں نظر آتی ہیں، جنہیں تیز اصلاحات تو روک دیتی ہیں مگر وہ اس طرح نہیں ٹوٹتیں جیسے روایتی ’’رسک آف‘‘ صورتحال میں ہونا چاہیے۔ اگر سرمایہ کار واقعی بحران سے بچاؤ کے لیے ین کی طرف دوڑ رہے ہوتے تو یہ جوڑا تیزی سے نیچے آ رہا ہوتا، نہ کہ تاریخی طور پر بلند سطحوں کے قریب پہلو بہ پہلو حرکت کر رہا ہوتا۔

دوسرے لفظوں میں، روایتی محفوظ کرنسیوں کی درجہ بندی کا نظام بظاہر خرابی کا شکار دکھائی دیتا ہے۔

سونے کی قیمت بڑھ رہی ہے، مگر ڈرامائی انداز میں نہیں۔ ڈالر زیادہ فیصلہ کن انداز میں مضبوط ہو رہا ہے۔ فرانک اور ین ان سرمائے کے بہاؤ کو اپنی طرف کھینچنے میں ناکام دکھائی دے رہے ہیں جو عموماً جغرافیائی سیاسی گھبراہٹ کے وقت دیکھنے میں آتے ہیں۔ یہ رجحان ظاہر کرتا ہے کہ سرمایہ کار جنگ کے خطرے کے بجائے لیکویڈیٹی کے خطرے سے بچاؤ کی کوشش کر رہے ہیں۔

یہ فرق بظاہر نظریاتی لگ سکتا ہے، مگر یہی بات منڈیوں میں دکھائی دینے والی اس غیر معمولی ہم آہنگی کی وضاحت کرتی ہے۔

آبنائے ہرمز کو خطرہ لاحق کرنے والا تنازع مالیاتی نقطۂ نظر سے دو بالکل مختلف اثرات رکھتا ہے۔ پہلا واضح جغرافیائی سیاسی خطرہ ہے: رسد میں خلل، عسکری کشیدگی میں اضافہ اور عالمی غیر یقینی صورتحال۔ دوسرا توانائی کا جھٹکا ہے۔ اگر کسی اہم سمندری تجارتی راستے کو خطرہ لاحق ہونے کے باعث تیل کی قیمتیں اچانک بڑھ جائیں تو مہنگائی کی توقعات اس وقت دوبارہ اوپر جا سکتی ہیں جب مرکزی بینک پہلے ہی پالیسی میں نرمی کی تیاری کر رہے ہوں۔

ایسے سرمایہ کاروں کے لیے، جو پہلے ہی شرحِ سود میں کمی کے امکان پر پوزیشن لے چکے ہوں، یہ صورتحال خاصی مشکل بن جاتی ہے۔ تیل کی قیمت میں اچانک اضافہ شرحِ سود میں کمی کو مؤخر کر سکتا ہے، مالیاتی حالات کو سخت بنا سکتا ہے اور بانڈز، ایکویٹیز اور کرنسیوں میں تیزی سے دوبارہ قیمتوں کا تعین کروا سکتا ہے۔ اس کا نتیجہ لیکویڈیٹی کے لیے ایک ہنگامی دوڑ کی صورت میں نکلتا ہے۔

ایسے ماحول میں ڈالر اکثر پہلے سے طے شدہ تحفظ کا ذریعہ بن جاتا ہے۔ ضروری نہیں کہ یہ سب سے محفوظ اثاثہ ہو، مگر جب باقی سب کچھ فروخت ہو رہا ہو تو اسے رکھنا سب سے آسان ہوتا ہے۔

سونا اب بھی مہنگائی سے متعلق وسیع تر بیانیے سے فائدہ اٹھا رہا ہے۔ چارٹ پر اس کا طویل مدتی تیزی کا رجحان اس دنیا کی عکاسی کرتا ہے جہاں مرکزی بینک اپنی بیلنس شیٹس کو وسعت دے چکے ہیں، جغرافیائی سیاسی خطرات بڑھ رہے ہیں اور سرمایہ کار کاغذی کرنسیوں کی پائیداری پر بڑھتے ہوئے سوال اٹھا رہے ہیں۔

مگر قلیل مدت میں سونے کو ڈالر کی لیکویڈیٹی کی برتری کا مقابلہ کرنا پڑتا ہے۔ یہی کشمکش حالیہ دنوں میں قیمتوں کے چارٹ پر نظر آنے والی بے قاعدہ حرکات کی وضاحت کرتی ہے۔

یوں محسوس ہوتا ہے کہ منڈیاں بیک وقت دو باہم جڑے جھٹکوں کا سامنا کر رہی ہیں۔ ایک جغرافیائی سیاسی ہے، جس کی جڑیں مشرقِ وسطیٰ میں پھیلتے ہوئے تنازع میں ہیں۔ دوسرا مالیاتی ہے، جو اس خدشے کے گرد گھومتا ہے کہ توانائی کی قیمتیں عالمی سطح پر مہنگائی میں کمی کے عمل کو پیچیدہ بنا سکتی ہیں۔

ان دونوں قوتوں کے درمیان غیر یقینی توازن ہر چارٹ میں نمایاں ہے۔ سونا گرنے سے انکار کرتا ہے کیونکہ جغرافیائی سیاسی منظرنامہ بدستور دھماکہ خیز ہے۔ ڈالر کمزور ہونے کو تیار نہیں کیونکہ لیکویڈیٹی کی طلب مضبوط ہے۔ اور روایتی محفوظ کرنسیاں ان دونوں کے درمیان الجھی ہوئی نظر آتی ہیں، جیسے انہیں خود معلوم نہ ہو کہ وہ کس کہانی کا حصہ ہیں۔

سرمایہ کار سادہ بحرانوں کو پسند کرتے ہیں۔ مگر یہ بحران ہرگز سادہ نہیں۔

کاپی رائٹ: بزنس ریکارڈر، 2026