بیان میں کہا گیا ہے کہ ” دبئی ایئرپورٹس اعلان کرتا ہے کہ دبئی انٹرنیشنل ایئرپورٹ (ڈی ایکس بی) اور دبئی ورلڈ سینٹرل - المکتوم انٹرنیشنل ایئرپورٹ سے آج شام، پیر 2 مارچ 2026 سے محدود پروازیں بحال کی جا رہی ہیں۔“

ایمریٹس اور کم لاگت ایئرلائن فلائی دبئی دونوں نے کہا ہے کہ وہ پیر کی شام سے کچھ پروازیں دوبارہ شروع کریں گی۔

جبکہ اتحاد ایئرویز، جو ابوظہبی سے پروازیں چلاتی ہے، نے کہا ہے کہ وہ منگل سے اپنی پروازیں بحال کرے گی۔

خلیجی ریاستوں میں ایران کی غیر معمولی بمباری نے جہاں فوجی اڈوں کو نشانہ بنایا وہیں رہائشی عمارتوں، ہوٹلوں، ہوائی اڈوں اور سمندری بندرگاہوں جیسے سویلین انفراسٹرکچر کو بھی متاثر کیا، جس سے ایک ایسے خطے میں تشویش پھیل گئی جو طویل عرصے سے مشرقِ وسطیٰ کے تنازعات سے نسبتاً محفوظ سمجھا جاتا تھا۔

ہفتے کے روز ایران کی کارروائی شروع ہونے کے بعد دبئی، ابوظہبی، کویت اور منامہ کے ہوائی اڈوں کو نشانہ بنایا گیا۔

حکام کے مطابق اماراتی دارالحکومت ابوظہبی میں اس ”واقعے“ کے دوران ایک شخص ہلاک ہوا۔

ہفتے کے روز متحدہ عرب امارات نے احتیاطی اقدام کے طور پر اپنی فضائی حدود کو ”عارضی اور جزوی طور پر“ بند کرنے کا اعلان کیا تھا۔

دبئی کا مرکزی ہوائی اڈہ ( ڈی ایکس بی) عالمی سطح پر مصروف ترین ہوائی اڈوں میں دوسرے نمبر پر ہے، جو امریکہ کے ہارٹسفیلڈ-جیکسن اٹلانٹا انٹرنیشنل ایئرپورٹ کے بعد آتا ہے، یہ درجہ بندی ایئرپورٹس کونسل انٹرنیشنل کے مطابق ہے۔

فضائی حدود کی بندش نے شہر کے ایک اہم شعبے کو متاثر کیا، کیونکہ دبئی کی فضائی صنعت امارات کی معیشت کا تقریباً ایک تہائی حصہ ہے۔