سرکاری بیان میں سفارت خانے نے تصدیق کی ہے کہ وہ کراچی اور لاہور میں امریکی قونصل خانوں کے باہر ہونے والے مظاہروں کی رپورٹس کی کڑی نگرانی کر رہا ہے۔ مزید برآں مشن نے اسلام آباد میں امریکی سفارت خانے اور پشاور میں قونصل خانے کے قریب مزید اجتماعات کی کالز کا بھی نوٹس لیا ہے۔

سفارت خانے نے ملک میں موجود امریکی شہریوں پر زور دیا ہے کہ وہ انتہائی چوکنا رہیں اور ذاتی حفاظتی تدابیر اختیار کریں۔ امریکیوں کو ہدایت کی گئی ہے کہ وہ اپنے گردونواح سے باخبر رہیں اور لمحہ بہ لمحہ اپ ڈیٹس کے لیے مقامی نیوز چینلز پر نظر رکھیں۔ شہریوں کو مشورہ دیا گیا ہے کہ وہ ان علاقوں سے دور رہیں جہاں بڑے گروہ جمع ہوں۔امریکی مشن نے اسمارٹ ٹریولر انرولمنٹ پروگرام میں رجسٹریشن کو اپ ٹو ڈیٹ رکھنے پر بھی زور دیا ہے۔

یہ ایڈوائزری ایک ایسے وقت میں آئی ہے جب سفارتی علاقوں اور قونصل خانوں کے گرد سیکیورٹی انتہائی سخت ہے, تاکہ روزمرہ کے امور میں کسی بھی ممکنہ خلل یا عملے کے لیے خطرات کو روکا جا سکے۔

یہ پیش رفت ایک ایسے وقت میں ہوئی ہے جب اتوار کے روز کراچی میں امریکی قونصل خانے کے باہر مظاہرین اور قانون نافذ کرنے والے اداروں کے درمیان ہونے والے پرتشدد تصادم میں کم از کم 9 افراد ہلاک اور 12 سے زائد زخمی ہو گئے۔ یہ واقعہ ایران کے سپریم لیڈر آیت اللہ علی خامنہ ای کی شہادت کے چند گھنٹے بعد پیش آیا، جو امریکہ اور اسرائیل کے ایک بڑے حملے کے آغاز میں جانبحق ہوئے۔ ریسکیو 1122 سندھ کے مطابق تصادم اس وقت شروع ہوا جب مظاہرین نے قونصل خانے کی حدود میں داخل ہونے کی کوشش کی، جس پر سیکیورٹی فورسز نے کارروائی کی۔

دریں اثنا وزیر داخلہ محسن نقوی نے اتوار کو کہا کہ پرامن احتجاج ہر کسی کا حق ہے لیکن احتجاج کی آڑ میں توڑ پھوڑ کو کسی صورت برداشت نہیں کیا جائے گا۔ انہوں نے یہ بات اسلام آباد کے مختلف علاقوں کے دورے کے دوران امن و امان کی صورتحال کا جائزہ لیتے ہوئے کہی۔ ریڈ زون اور ڈپلومیٹک انکلیو کے دورے کے دوران انہوں نے سیکیورٹی انتظامات کا معائنہ کیا اور فول پروف سیکیورٹی یقینی بنانے کی ہدایت کی۔ انہوں نے زور دیا کہ روزمرہ زندگی میں خلل ڈالنے والوں کے خلاف قانون اپنا راستہ خود بنائے گا۔