صدر ٹرمپ کے بقول ان حملوں کا مقصد ایران کی میزائل انڈسٹری کو تباہ کرنا اور اس کی بحریہ کو نیست و نابود کرنا ہے، اس سے پہلے امریکہ اور اسرائیل کی جانب سے بار بار انتباہ دیا گیا تھا کہ اگر ایران اپنے جوہری اور بیلسٹک میزائل پروگرامز کو آگے بڑھاتا رہا تو وہ دوبارہ حملہ کریں گے۔

ٹرمپ نے اپنے سوشل میڈیا پلیٹ فارم ٹروتھ سوشل پر شیئر کی گئی ایک ویڈیو میں کہا کہ میں یہ بیان آسانی سے نہیں دے رہا، ایرانی حکومت قتل و غارت کی خواہاں ہے۔

ہمارے بہادر امریکی ہیروز (فوجیوں) کی جانیں جاسکتی ہیں اور ہمیں جانی نقصان اٹھانا پڑ سکتا ہے جیسا کہ جنگوں میں اکثر ہوتا ہے، لیکن ہم یہ سب موجودہ وقت کیلئے نہیں کررہے، ہم یہ مستقبل کی خاطر کررہے ہیں اور یہ ایک عظیم مشن ہے۔

ٹرمپ نے ایرانی مسلح افواج پاسدارانِ انقلاب اسلامی کے ارکان سے کہا کہ وہ اپنے ہتھیار ڈال دیں، ساتھ ہی انہوں نے وعدہ کیا کہ ایسا کرنے پر انہیں سزاؤں سے استثنیٰ دیا جائے گا۔

ٹرمپ کے مطابق دوسرا راستہ یقینی موت ہے۔

واضح رہے کہ واشنگٹن اور تہران کے درمیان حالیہ ہفتوں میں ایران کے جوہری عزائم کے حوالے سے مذاکرات کے کئی دور ہوئے جن میں سب سے حالیہ نشست جمعرات کو ہوئی جو کسی معاہدے کے بغیر ختم ہوگئی۔

ٹرمپ نے کہا کہ ایران نے انکار کردیا، بالکل ویسے ہی جیسے وہ دہائیوں سے کرتا آرہا ہے۔ انہوں نے اپنے جوہری عزائم سے دستبردار ہونے کا ہر موقع مسترد کردیا اور اب ہم اسے مزید برداشت نہیں کرسکتے۔