ایک سینئر امریکی عہدیدار نے پیر کو بتایا ہے کہ امریکی ایلچی اسٹیو وٹکوف اور امریکی صدر ڈونلڈ ٹرمپ کے داماد جیرڈ کشنر جمعرات کو جنیوا میں ایرانی وفد سے ملاقات کریں گے، جس کی قیادت وزیر خارجہ عباس عراقچی کر رہے ہیں۔

دونوں ممالک نے طویل عرصے سے متنازع جوہری پروگرام پر رواں ماہ کے اوائل میں مذاکرات دوبارہ شروع کیے، ایسے وقت میں جب امریکہ ممکنہ حملوں سے قبل مشرق وسطیٰ میں اپنی عسکری صلاحیت بڑھا رہا ہے۔ ایران نے خبردار کیا ہے کہ اگر اس پر حملہ کیا گیا تو وہ خطے میں امریکی اڈوں کو نشانہ بنائے گا۔

ڈونلڈ ٹرمپ نے 19 فروری کو کہا تھا کہ وہ تہران کو معاہدہ کرنے کے لیے تقریباً 10 سے 15 دن کا وقت دے رہے ہیں۔

ایران کے صدر مسعود پزشکیان نے سرکاری میڈیا کو دیے گئے بیان میں کہا ہے کہ ” مذاکرات کے حوالے سے ہم مثبت امکانات دیکھ رہے ہیں، کل جنیوا میں ڈاکٹر عراقچی کی ہونے والی ملاقات میں… ہم نے سپریم لیڈر کی رہنمائی میں اس عمل کو اس طرح آگے بڑھانے کی کوشش کی ہے کہ ‘نہ جنگ نہ امن’ کی کیفیت سے نکل سکیں۔“

وزیر خارجہ عباس عراقچی نے منگل کو کہا ہے کہ امریکہ کے ساتھ معاہدہ ”قریب ہے، لیکن صرف اسی صورت میں جب سفارت کاری کو ترجیح دی جائے۔“

امریکہ اور اسرائیل کا ماننا ہے کہ ایران جوہری ہتھیار بنانے کی خواہش رکھتا ہے جو اسرائیل کے وجود کے لیے خطرہ بن سکتا ہے۔ ایران کا کہنا ہے کہ اس کا جوہری پروگرام مکمل طور پر پرامن مقاصد کے لیے ہے، اگرچہ اس نے یورینیم کو بجلی پیدا کرنے کے لیے درکار سطح سے کہیں زیادہ اور بم بنانے کے قریب سطح تک افزودہ کیا ہے۔