بروک کو ان کے معمول کے پانچویں نمبر کے بجائے تیسرے نمبر پر بھیجا گیا، جس کے بارے میں انہوں نے بتایا کہ یہ ہیڈ کوچ برینڈن میکولم (باز) کا ماسٹر مائنڈ منصوبہ تھا۔ بروک کا کہنا تھا کہ پاور پلے کا فائدہ اٹھانے کی حکمت عملی کامیاب رہی، تاہم وہ مستقبل میں اسی نمبر پر کھیلنے کے حوالے سے تذبذب کا شکار ہیں اور اس کا فیصلہ کوچ سے مشاورت کے بعد کریں گے۔ ان کے مطابق سیٹ ہونے کے بعد مڈل اوورز میں بہترین باؤلرز کا سامنا کرنا آسان ہو جاتا ہے۔

یہ اننگز بروک کے لیے اس لیے بھی اہم ہے کیونکہ نیوزی لینڈ میں نائٹ کلب کے باؤنسر سے جھگڑے کی خبروں کے بعد وہ شدید دباؤ میں تھے۔ انہوں نے اسے اپنی زندگی کا مشکل ترین موسمِ سرما قرار دیتے ہوئے کہا کہ میدان سے باہر کی محنت رنگ لائی ہے۔ شاہین آفریدی نے بھی بروک کی اننگز کو ان کی زندگی کی بہترین باری قرار دیتے ہوئے اعتراف کیا کہ جہاں دیگر بلے باز جدوجہد کر رہے تھے، وہاں بروک نے بہترین شاٹس کھیلے۔