اسپاٹ گولڈ 1.5 فیصد کمی کے ساتھ 5,150.38 ڈالر فی اونس پر آگیا، جبکہ سیشن کے دوران اس نے تین ہفتوں سے زائد کی بلند ترین سطح حاصل کی تھی۔ اپریل ڈیلیوری کے لیے امریکی گولڈ فیوچرز 1.1 فیصد کمی کے ساتھ 5,170.70 ڈالر پر ٹریڈ ہوتے رہے۔

ڈالر کی قدر میں اضافے کے باعث دیگر کرنسی رکھنے والے سرمایہ کاروں کے لیے سونا مہنگا ہوگیا، جس سے طلب میں کمی دیکھی گئی۔ امریکی صدر ڈونلڈ ٹرمپ نے پیر کو خبردار کیا کہ اگر ممالک امریکا کے ساتھ حالیہ طے پانے والے تجارتی معاہدوں سے پیچھے ہٹے تو ان پر دیگر قوانین کے تحت زیادہ ٹیرف عائد کیے جائیں گے۔ یہ بیان امریکی سپریم کورٹ کی جانب سے ہنگامی ٹیرف منسوخ کیے جانے کے بعد سامنے آیا۔

ادھر فیڈرل ریزرو کے گورنر کرسٹوفر والر نے کہا کہ اگر فروری کے روزگار کے اعداد و شمار سے ظاہر ہوا کہ لیبر مارکیٹ مستحکم ہو رہی ہے تو مارچ کے اجلاس میں شرح سود برقرار رکھی جا سکتی ہے۔ مارکیٹوں کو اس سال تین مرتبہ 25 بیسس پوائنٹس کی شرح سود میں کمی کی توقع ہے۔

ایشیا کی اسٹاک مارکیٹوں میں بھی ابتدائی ٹریڈنگ کے دوران اتار چڑھاؤ دیکھا گیا، کیونکہ وال اسٹریٹ میں فروخت کے رجحان نے سرمایہ کاروں کو محتاط بنا دیا۔ امریکی محکمہ خارجہ نے بیروت میں سفارتخانے سے غیر ضروری عملہ واپس بلانے کا اعلان کیا ہے، جس سے ایران کے ساتھ ممکنہ فوجی تصادم کے خدشات بڑھ گئے ہیں۔

دیگر قیمتی دھاتوں میں اسپاٹ چاندی 3.1 فیصد کمی کے ساتھ 85.50 ڈالر فی اونس پر آگئی۔ پلاٹینم 2.9 فیصد کمی کے ساتھ 2,092.31 ڈالر جبکہ پیلیڈیم 2.1 فیصد کمی کے ساتھ 1,706.50 ڈالر پر ٹریڈ ہوا۔