یورپی پارلیمنٹ کے مذاکرات کار پیر کی دوپہر کو ملاقات کریں گے تاکہ پچھلے سال طے پائے معاہدے کی منظوری کے منصوبے کو رسمی طور پر منجمد کرنے پر اتفاق کیا جا سکے۔

پارلیمنٹ کی تجارتی کمیٹی منگل کو اس معاہدے کے تحت امریکی صنعتی مصنوعات پر ٹیرف ختم کرنے کی منظوری دینے والی تھی۔

تاہم، مختلف پارلیمانی گروپوں کے قانون سازوں نے کہا کہ وہ اس معاہدے کو معطل کرنے کی حمایت کرتے ہیں جب تک کہ یہ واضح نہ ہو جائے کہ امریکی فیصلے کا یورپی یونین پر کیا اثر ہوگا۔

تجارتی کمیٹی کے سربراہ برنڈ لانگے نے مذاکرات کاروں کا ہنگامی اجلاس طلب کیا اور کہا کہ وہ قانون سازی کے کام کو روکنے کی تجویز دیں گے۔

انہیں یورپی پارلیمنٹ کے سب سے بڑے گروپ ای پی پی اور دیگر بلاکس کی حمایت حاصل تھی۔

ای پی پی کی رکن یورپی پارلیمنٹ زیلجانا زوفکو نے اے ایف پی کو بتایا کہ وہ اس وقت تک کام کو روکنے کی حمایت کرتی ہیں جب تک یورپی کمیشن واشنگٹن کے ساتھ واضح نہ کرے کہ یورپی یونین کے لیے شرائط کیا ہیں اور یہ کہ ”ہمارے لیے آگے بڑھنے کا بہتر آپشن کیا ہے۔“

گرین پارٹی کی رکن یورپی پارلیمنٹ انا کاوازینی نے کہا کہ وہ ووٹ کو اس وقت تک روکنے کی حمایت کرتی ہیں جب تک اس معاملے میں مزید وضاحت نہ آ جائے۔

ٹرمپ نے گزشتہ اختتام ہفتہ امریکہ میں درآمدات پر عالمی ڈیوٹی عارضی طور پر 15 فیصد کر دی، جس کے بعد یورپی یونین نے ان سے معاہدے کی پاسداری کا مطالبہ کیا۔

اس معاہدے کے تحت واشنگٹن نے زیادہ تر یورپی مصنوعات پر یکساں 15 فیصد ٹیرف لگانے پر اتفاق کیا تھا، لیکن اس کی عالمی ڈیوٹی یورپی مصنوعات کے لیے زیادہ محصولات پیدا کر سکتی ہے۔

لبرل رینیو گروپ کی یورپی قانون ساز کیرن کارلسبرو نے معاہدے کا حوالہ دیتے ہوئے کہا کہ ”ہم ٹرن بیری معاہدے پر اس وقت تک ووٹ نہیں دے سکیں گے جب تک کہ یہ واضح نہ ہو کہ سپریم کورٹ کا فیصلہ ٹیرف کے انتظامات پر کس طرح اثر انداز ہوتا ہے۔“

انہوں نے مزید کہا کہ ” امریکہ کو اپنی تجارتی پالیسی کو ترتیب دینا چاہیے، اس سطح پر افراتفری غیر سنجیدہ ہے۔“