پیر کو جاری اعلامیے کے مطابق خریدار کمپنی ایو ہولڈنگز ابوظہبی میں رجسٹرڈ اسپیشل پرپز ہولڈنگ کمپنی ہے۔ دوسری جانب فرسٹ ویمن بینک پاکستان میں ایک پبلک ان لسٹڈ کمرشل بینک ہے جو بینکنگ اور مالیاتی خدمات فراہم کرتا ہے۔ اس منظور شدہ ٹرانزیکشن کے تحت ایو ہولڈنگز حکومتِ پاکستان اور موجودہ ادارہ جاتی شیئر ہولڈرز بشمول حبیب بینک، ایم سی بی بینک، الائیڈ بینک، نیشنل بینک اور یونائیٹڈ بینک سے فرسٹ ویمن بینک کے تمام حصص خرید لے گی۔

اس عمل کی تکمیل پر ایو ہولڈنگز فرسٹ ویمن بینک لمیٹڈ کی مکمل ملکیت اور انتظام سنبھال لے گی۔

کمپٹیشن کمیشن کی تشخیص میں یہ بات سامنے آئی کہ کمرشل بینکنگ کی مارکیٹ میں فرسٹ ویمن بینک کا حصہ محدود ہے جبکہ خریدار کمپنی کا متعلقہ مارکیٹ میں پہلے سے کوئی آپریشن موجود نہیں ہے۔ لہٰذا یہ ٹرانزیکشن ایک کنگلومریٹ مرجر (مختلف شعبوں کے ملاپ) کی حیثیت رکھتی ہے جس سے مارکیٹ میں مقابلے کی فضا متاثر ہونے کا کوئی خدشہ نہیں ہے۔

کمیشن نے نتیجہ اخذ کیا کہ اس خریداری سے مارکیٹ میں کسی اجارہ داری کے قائم ہونے یا مقابلے کی فضا میں کمی آنے کا کوئی امکان نہیں ہے۔

اسی بنیاد پر سی سی پی نے کمپٹیشن ایکٹ 2010 کی دفعات کے تحت اس لین دین کی باقاعدہ اجازت دے دی ہے۔ سی سی پی کا کہنا ہے کہ یہ حصول پاکستان کے مالیاتی شعبے میں غیر ملکی سرمایہ کاروں کی مسلسل دلچسپی کی عکاسی کرتا ہے اور غیر ملکی براہِ راست سرمایہ کاری (ایف ڈی آئی) کے فروغ، مالیاتی اداروں کی مضبوطی اور معاشی ترقی کے لیے شفاف نجکاری اور موثر ریگولیشن کی اہمیت کو اجاگر کرتا ہے۔