سوشل میڈیا پر اپنی ایک پوسٹ میں انہوں نے ملبوسات اور ویلیو ایڈڈ گارمنٹس کو ترقی کا فوری ذریعہ قرار دیا جبکہ پائیدار صنعتی توسیع کے لیے ڈھانچہ جاتی اصلاحات، توانائی کے شعبے میں بہتری اور مہارتوں کی نشوونما میں مستقل سرمایہ کاری پر زور دیا۔

ان کا کہنا تھا کہ مختصر مدت میں ملبوسات اور ویلیو ایڈڈ گارمنٹس برآمدات بڑھانے کا سب سے تیز راستہ فراہم کرتے ہیں۔

سی ای او نے واضح کیا کہ پاکستان کے پاس اس شعبے میں صنعتی بنیاد، آپریشنل مہارت اور مارکیٹ کے تعلقات پہلے سے موجود ہیں۔ انہوں نے مزید کہا کہ اگر ہم پالیسی کی رکاوٹوں کو ختم کر دیں اور واقعی یکساں مواقع فراہم کریں تو یہ شعبہ نسبتاً تیزی سے نمایاں نتائج دے سکتا ہے۔ تاہم مختصر مدتی فوائد ہمیں طویل مدتی صلاحیت سازی سے غافل نہ کر دیں۔

مصدق ذوالقرنین نے پاکستان کی بڑھتی ہوئی نوجوان آبادی کے لیے مہارتوں کی نشوونما میں سرمایہ کاری کر کے مینوفیکچرنگ کے دیگر شعبوں میں تنوع لانے پر زور دیا۔ ان کا کہنا تھا کہ آبادی کا یہ فائدہ صرف اس صورت میں حاصل ہوگا اگر ہم اپنی افرادی قوت کو ابھی سے مستقبل کی ضروریات کے مطابق ہنر مند بنائیں، تاکہ آنے والی دہائی میں نتائج حاصل کیے جا سکیں۔

اس کے ساتھ ہی انہوں نے کہا کہ ڈھانچہ جاتی رکاوٹوں خاص طور پر توانائی کے شعبے کے مسائل کو حل کرنا ضروری ہے۔ ان کی رائے میں مسابقتی اور قابلِ بھروسہ توانائی اور ایک مستحکم پالیسی فریم ورک ہی مستقل سرمایہ کاری کی بنیاد ہیں۔

انہوں نے اپنی بات مکمل کرتے ہوئے کہا کہ اتنا ہی اہم یہ پیغام دینا ہے کہ مینوفیکچرنگ (صنعت کاری) ایک قومی ترجیح ہے، تاکہ مقامی اور غیر ملکی سرمایہ کاروں کی حوصلہ افزائی ہو کہ وہ ویلیو ایڈڈ صنعتوں میں طویل مدتی سرمایہ لگائیں۔ان بنیادی عوامل کے بغیر برآمدات پر مبنی ترقی محدود رہے گی۔