ایس ای سی پی نے اہم ریگولیٹری فیصلہ کرتے ہوئے نان لسٹڈ کمپنیوں کے فزیکل شیئر سرٹیفکیٹس کو سینٹرل ڈپازٹری سسٹم کے تحت الیکٹرانک فارم میں منتقل کرنے کا اعلان کردیا ہے۔

کمیشن کے مطابق آئندہ نان لسٹڈ کمپنیوں کے شیئرز کی خرید و فروخت یا منتقلی فزیکل فارم میں ممکن نہیں ہوگی اور تمام ٹرانزیکشنز ڈیجیٹل نظام کے ذریعے انجام دی جائیں گی۔

ایس ای سی پی کے فیصلے کے تحت نان لسٹڈ کمپنیوں کو ہدایت کی گئی ہے کہ وہ رائٹس ایشو، بونس شیئرز، بائی بیک یا کسی بھی قسم کی ٹرانسفر سے قبل اپنے فزیکل شیئرز کو لازمی طور پر الیکٹرانک شکل میں تبدیل کریں۔

کمیشن کا کہنا ہے کہ اس اقدام سے فزیکل شیئرز سے وابستہ جعلسازی، چوری، گمشدگی اور ریکارڈ میں ردوبدل جیسے خطرات کا خاتمہ ہوگا۔

حکام کے مطابق الیکٹرانک شیئرز کے نفاذ سے ملکیت کا ریکارڈ محفوظ اور مرکزی نظام میں دستیاب ہوگا جس سے شیئر ہولڈرز اور کمپنیوں کے درمیان تنازعات میں واضح کمی آئے گی۔

ڈیجیٹل نظام کے باعث شیئرز کی منتقلی کا عمل تیز، شفاف اور محفوظ ہوگا جبکہ سیٹلمنٹ کا دورانیہ بھی کم ہو جائے گا۔

ایس ای سی پی نے واضح کیا ہے کہ آئندہ تمام شیئر ٹرانزیکشنز سینٹرل ڈیپازٹری سسٹم کے ذریعے انجام پائیں گی اور فزیکل سرٹیفکیٹس قابل قبول نہیں ہوں گے۔

مزید برآں الیکٹرانک شیئرز کو بینک قرض کے حصول کیلئے بطور ضمانت بھی استعمال کیا جاسکے گا جس سے کارپوریٹ فنانسنگ میں سہولت پیدا ہوگی۔

ماہرین کے مطابق یہ اقدام پاکستان میں کارپوریٹ گورننس کو مضبوط بنانے، سرمایہ کاروں کے اعتماد میں اضافے اور ڈیجیٹل معیشت کی جانب پیشرفت میں اہم سنگ میل ثابت ہوگا، نان لسٹڈ کمپنیوں کے لیے یہ فیصلہ ایک بڑی انتظامی تبدیلی ہے جس سے دستاویزی شفافیت، قانونی تحفظ اور مالیاتی نظام کی بہتری متوقع ہے۔