پی ایس ایل فرینچائز حیدرآباد کنگز مین نے اس پیش رفت کی تصدیق کرتے ہوئے اعلان کیا ہے کہ میکسویل کے ساتھ باضابطہ معاہدہ کر لیا گیا ہے اور وہ پی ایس ایل 11 میں ٹیم کی نمائندگی کریں گے۔ فرینچائز نے اپنے بیان میں کہا کہ حیدرآباد کنگز مین نے پی ایس ایل 11 کے لیے آسٹریلوی اسٹار گلین میکسویل کو سائن کر لیا ہے۔ وہ آنے والے سیزن میں ہماری فرینچائز کی نمائندگی کریں گے۔

میکسویل نے پاکستان کی اس لیگ کا حصہ بننے پر بے حد خوشی کا اظہار کرتے ہوئے کہا کہ وہ پی ایس ایل میں کھیلنے اور حیدرآباد کی نمائندگی کرنے کے منتظر ہیں۔ انہوں نے کہا کہ میں پاکستان سپر لیگ کا حصہ بننے اور حیدرآباد کی نمائندگی کرنے پر بہت خوش ہوں۔ مجھے پاکستان سے ہمیشہ بہت پیار ملا ہے اور حیدرآباد کی ٹیم کی نمائندگی کرنا میرے لیے اعزاز کی بات ہے۔ پی ایس ایل میں ملاقات ہوگی۔

توقع کی جا رہی ہے کہ اس جارح مزاج آل راؤنڈر کی شمولیت سے آئندہ سیزن کی مقبولیت اور مقابلے کی فضا میں مزید اضافہ ہوگا، کیونکہ پی ایس ایل 11 میں کئی نامور بین الاقوامی کھلاڑیوں کی شرکت متوقع ہے۔