یہ پیش رفت ایسے وقت میں سامنے آئی ہے جب روس اور یوکرین کے نمائندے امریکا کی ثالثی میں جنیوا میں دو روزہ مذاکرات مکمل کر چکے ہیں۔ بدھ کو اختتام پذیر ہونے والے ان مذاکرات کا مقصد چار برس سے جاری جنگ کے خاتمے کے لیے کوئی قابل قبول حل تلاش کرنا تھا۔ تاہم دونوں جانب سے بات چیت کو مشکل قرار دیا گیا اور کسی بڑی پیش رفت کا اعلان نہیں کیا گیا۔

روسی وزارت دفاع نے ایک بیان میں کہا کہ بدھ اور جمعرات کی درمیانی شب روسی فضائی دفاعی نظام نے 113 یوکرینی ڈرونز کو روک کر تباہ کیا۔ حکام کے مطابق ایک ڈرون حملہ ویلیکیے لوکی کے علاقے میں قائم آئل ریفائنری پر کیا گیا جو ماسکو سے تقریباً 500 کلومیٹر مغرب میں واقع ہے۔

علاقائی گورنر میخائل ویدرنیکوف نے بتایا کہ حملے کے نتیجے میں تیل ذخیرہ کرنے والے ایک ٹینک میں آگ لگ گئی، تاہم ابتدائی اطلاعات کے مطابق نہ تو شہریوں اور نہ ہی ریفائنری کے عملے میں کوئی جانی نقصان ہوا۔

دوسری جانب یوکرین گزشتہ چار برس سے روسی بمباری اور میزائل حملوں کا سامنا کر رہا ہے اور حالیہ مہینوں میں اس نے جوابی کارروائیوں کے طور پر روسی آئل ریفائنریوں، بندرگاہوں اور توانائی کے بنیادی ڈھانچے کو نشانہ بنایا ہے۔ جنگ کے تسلسل کے باعث دونوں ممالک کے درمیان کشیدگی بدستور برقرار ہے۔