کاروبار کے اختتام پر ڈالر کے مقابلے میں روپیہ 3 پیسے کی معمولی بہتری سے 279.57 روپے پر بند ہوا۔

یاد رہے کہ مقامی کرنسی منگل کو279.60 روپے پر بند ہوئی تھی۔

دوسری جانب عالمی مارکیٹ میں بدھ کو ڈالر مستحکم رہا کیونکہ جغرافیائی سیاسی خطرات نے مارکیٹ کو بے چین کر رکھا ہے اور سرمایہ کار فیڈرل ریزرو کی جانب سے شرح سود میں کمی کے اشاروں کے منتظر ہیں۔

جاپانی مینوفیکچررز کے اعتماد میں بہتری اور صدر ڈونلڈ ٹرمپ کی جانب سے امریکہ میں ٹوکیو کی بھاری سرمایہ کاری کی پہلی قسط کے اعلان کے بعد جاپانی ین بھی مستحکم رہا۔ ڈالر انڈیکس جو دنیا کی اہم کرنسیوں کے مقابلے میں ڈالر کی قدر کی پیمائش کرتا ہے، معمولی تبدیلی کے ساتھ 97.16 پر رہا، جبکہ یورو 0.06 فیصد گر کر 1.1846 ڈالر پر آگیا۔

عالمی منڈی میں خام تیل کی قیمتوں میں بھی استحکام دیکھا گیا کیونکہ سرمایہ کار امریکہ اور ایران کے مذاکرات میں پیش رفت کا جائزہ لے رہے ہیں۔ برینٹ فیوچرز 23 سینٹس اضافے کے ساتھ 67.65 ڈالر فی بیرل، جبکہ امریکی خام تیل (ڈبلیوٹی آئی) 19 سینٹس اضافے کے ساتھ 62.52 ڈالر پر پہنچ گیا۔ تیل کی یہ قیمتیں اس وقت تقریباً دو ہفتوں کی کم ترین سطح پر ہیں۔