نوٹیفکیشن کے مطابق 100 یونٹ تک بجلی استعمال کرنے والے پروٹیکٹڈ صارفین کو 200 روپے کے فکسڈ چارج سے مستثنیٰ قرار دیا گیا ہے۔ تاہم 200 یونٹ تک بجلی استعمال کرنے والے تقریباً 9.9 ملین صارفین پر 200 روپے جبکہ اسی حد تک بجلی استعمال کرنے والے 6.1 ملین سے زائد پروٹیکٹڈ صارفین پر 300 روپے ماہانہ فکسڈ چارج عائد کیا گیا ہے۔

ایسے نان پروٹیکٹڈ صارفین جو چھ ماہ میں ایک بار بھی 100 یونٹ سے تجاوز کریں گے ان پر 275 روپے فی کلوواٹ فکسڈ چارج لاگو ہوگا، جس کا اطلاق تقریباً 5.7 ملین صارفین پر ہوگا۔ ان کے لیے فی یونٹ ٹیرف ٹیکسز کے بغیر 22.44 روپے سے زائد ہو جائے گا۔

نیپرا کی ویب سائٹ پر دستیاب نوٹیفکیشن کے مطابق 200 یونٹ سلیب کے تقریباً 2.24 ملین صارفین پر 300 روپے ماہانہ فکسڈ چارج ہوگا۔ 201 سے 300 یونٹ استعمال کرنے والے 2.9 ملین صارفین کے لیے یہ فیس 350 روپے جبکہ 301 سے 400 یونٹ استعمال کرنے والے تقریباً ایک ملین صارفین کے لیے 400 روپے مقرر کی گئی ہے۔ 401 سے 500 یونٹ استعمال کرنے والے 4 لاکھ صارفین 500 روپے ادا کریں گے، جبکہ 500 یونٹ سے زائد استعمال کرنے والوں پر 675 روپے فی کلوواٹ ماہانہ فکسڈ چارج لاگو ہوگا۔

نیپرا نے قرار دیا کہ پاور ڈویژن کے مطابق بجلی کے شعبے کی مقررہ ریونیو ریکوائرمنٹ کا بڑا حصہ فکسڈ اخراجات پر مشتمل ہے جبکہ موجودہ ٹیرف اسٹرکچر میں وصولیاں زیادہ تر فی یونٹ بنیاد پر ہوتی ہیں، جس سے لاگت اور وصولی میں عدم توازن پیدا ہو گیا ہے۔ آف گرڈ سولر تنصیبات میں نمایاں اضافے نے بھی اس صورتحال کو پیچیدہ بنایا ہے۔

اتھارٹی کے مطابق موجودہ نظام میں 93 فیصد لاگت فی یونٹ جبکہ صرف 7 فیصد فکسڈ چارجز سے وصول کی جاتی ہے، حالانکہ کیپیسٹی پیمنٹس، این ٹی ڈی سی اور ٹرانسمیشن اخراجات بڑی حد تک فکسڈ نوعیت کے ہیں۔ نیشنل الیکٹرک پلان کے تحت بھی ہدایت ہے کہ فکسڈ چارجز کو بتدریج بڑھایا جائے۔

نئے نظام کے تحت 300 یونٹ سے زائد اور ٹائم آف یوز صارفین کے لیے فکسڈ چارج میں اضافے کے بدلے ویری ایبل چارج میں کمی کی گئی ہے۔ فکسڈ چارجز سے حاصل رقم صنعتی صارفین کے لیے کراس سبسڈی کم کرنے پر صرف کی جائے گی جس کے نتیجے میں ان کے ویری ایبل ٹیرف میں مختلف کیٹیگریز میں 1 سے 4.58 روپے فی یونٹ تک کمی کی گئی ہے۔

کاپی رائٹ بزنس ریکارڈر، 2026