اسپاٹ گولڈ 0.4 فیصد کمی کے ساتھ 5,058.64 ڈالر فی اونس پر آ گیا، جبکہ گزشتہ سیشن میں اس میں ایک فیصد سے زائد اضافہ ہوا تھا۔ اپریل کے لیے امریکی گولڈ فیوچرز 0.3 فیصد کم ہو کر 5,080 ڈالر فی اونس رہے۔ اسپاٹ سلور 1.4 فیصد گر کر 82.87 ڈالر فی اونس پر آ گیا، حالانکہ بدھ کو اس میں 4 فیصد اضافہ ریکارڈ کیا گیا تھا۔

امریکی ڈالر انڈیکس میں بھی اضافہ ہوا، جو بدھ کے روز جاری ہونے والی مضبوط روزگار رپورٹ کے بعد مزید مستحکم ہوا۔ مضبوط ڈالر کے باعث گرین بیک میں قیمت طے ہونے والی دھاتیں دیگر کرنسی رکھنے والوں کے لیے مہنگی ہو جاتی ہیں، جس سے طلب متاثر ہوتی ہے۔

امریکی محکمہ محنت کے مطابق جنوری میں روزگار میں غیر متوقع اضافہ ہوا اور بے روزگاری کی شرح کم ہو کر 4.3 فیصد رہ گئی، جو لیبر مارکیٹ کے استحکام کی علامت ہے۔ اس صورتحال سے فیڈرل ریزرو کو افراطِ زر کی نگرانی کے دوران شرح سود کو کچھ عرصہ برقرار رکھنے کی گنجائش مل سکتی ہے۔ تاہم اعداد و شمار میں نظرثانی سے ظاہر ہوا کہ 2025 میں معیشت نے 584,000 کے بجائے صرف 181,000 نئی ملازمتیں پیدا کیں، جس سے لیبر مارکیٹ کی اصل صورتحال پر سوالات اٹھے ہیں۔

رائٹرز کے ایک سروے کے مطابق فیڈ چیئرمین جیروم پاول کی مدت مئی میں ختم ہونے تک شرح سود برقرار رکھی جا سکتی ہے، جبکہ جون میں ممکنہ کمی کا امکان ظاہر کیا گیا ہے۔

دیگر دھاتوں میں اسپاٹ پلاٹینم ایک فیصد کم ہو کر 2,110.63 ڈالر فی اونس رہا، جبکہ پیلاڈیم 0.4 فیصد اضافے سے 1,707.17 ڈالر فی اونس تک پہنچ گیا۔