اسلام آباد میں انڈس اے آئی ویک کی افتتاحی تقریب سے خطاب کرتے ہوئے وزیراعظم نے کہا کہ یہ سرمایہ کاری پاکستان میں اے آئی ایکو سسٹم کی تعمیر میں اہم کردار ادا کرے گی۔

انہوں نے کہا کہ نوجوانوں کو قیادت اور ڈیجیٹل معیشت کے لیے تیار کرنے کے لیے نہ صرف وفاق کے زیر انتظام تمام اسکولوں بلکہ آزاد جموں و کشمیر، گلگت بلتستان اور بلوچستان کے بیشتر حصوں میں بھی اے آئی کا نصاب متعارف کرایا جائے گا۔

وزیراعظم نے مزید اعلان کیا کہ حکومت 2030 تک ملک بھر کے نوجوانوں کو اے آئی کے شعبے میں ایک ہزار مکمل فنڈڈ پی ایچ ڈی اسکالرشپس فراہم کرے گی تاکہ عالمی معیار کا تحقیقی مرکز قائم کیا جا سکے۔

شہباز شریف نے کہا کہ حکومت ایک قومی سطح کا پروگرام بھی شروع کرے گی جس کے تحت دس لاکھ نان آئی ٹی پروفیشنلز کو اے آئی کی مہارتوں کی تربیت دی جائے گی، جس سے ان کی پیداواری صلاحیت میں اضافہ ہوگا اور روزگار کے مواقع بہتر ہوں گے۔

انہوں نے اس بات پر زور دیا کہ پاکستان اے آئی کے میدان میں دنیا کے ساتھ قدم سے قدم ملا کر چلنے کے لیے بالکل تیار ہے اور اس شعبے میں ایک مضبوط شراکت دار ثابت ہوگا۔

وزیراعظم نے کہا کہ نوجوانوں کو آئی ٹی ٹیکنیشنز سے اے آئی ماہرین میں تبدیل کرنے کے لیے خصوصی پروگرام متعارف کرائے جائیں گے۔ انہوں نے امید ظاہر کی کہ انڈس اے آئی ویک پاکستان کے ٹیکنالوجی کے منظرنامے میں انقلابی تبدیلی لائے گا اور یہ ایک گیم چینجر ثابت ہوگا۔

تقریب سے خطاب کرتے ہوئے وفاقی وزیر برائے منصوبہ بندی و ترقی احسن اقبال نے کہا کہ پاکستان ابھرتی ہوئی ٹیکنالوجیز کے شعبے میں نہ صرف اپنی شناخت بنائے گا بلکہ قیادت بھی کرے گا۔ انہوں نے بتایا کہ اس سال کوانٹم کمپیوٹنگ، جدید مینوفیکچرنگ اور نینو ٹیکنالوجی سمیت نئے قومی مراکز قائم کیے جا رہے ہیں۔

انہوں نے کہا کہ کوانٹم ویلی منصوبہ ایک جامع اختراعی ایکو سسٹم کا ماڈل ہوگا جس میں ابھرتی ہوئی ٹیکنالوجیز، معدنیات، ایگری ٹیک اور بایو سائنسز کے لیے چار خصوصی سائنس پارکس شامل ہوں گے۔

وفاقی وزیر برائے انفارمیشن ٹیکنالوجی شزا فاطمہ نے کہا کہ پاکستان اے آئی کو اس انداز میں فروغ دینا چاہتا ہے جو قومی ترجیحات، اقدار اور امنگوں سے ہم آہنگ ہو۔ انہوں نے بتایا کہ رواں سال ستمبر میں متعارف کرائی گئی قومی اے آئی پالیسی پر عملی عملدرآمد کا آغاز کیا جائے گا۔