وفاقی وزیر داخلہ محسن نقوی نے کابینہ سیکریٹریٹ اسٹیبلشمنٹ ڈویژن کی جانب سے جاری کردہ نوٹیفکیشن اپنے سوشل میڈیا اکاؤنٹ پر شیئر کرتے ہوئے ڈاکٹر عثمان کی خدمات کو سراہا۔ انہوں نے کہا کہ ان کی انقلابی قیادت نے پنجاب پولیس کو نئی پیشہ ورانہ معیارات، اصلاحات اور عوامی خدمت کے نئے سنگ میل عطا کیے۔ انہوں نے مزید کہا کہ بطور ڈی جی ایف آئی اے ان کی تعیناتی سے ایک نئے دور کا آغاز ہوگا اور آنے والے مہینوں میں عوام واضح تبدیلی دیکھیں گے۔

کابینہ سیکریٹریٹ کے جاری کردہ نوٹیفکیشن کے مطابق ڈاکٹر عثمان انور، جو پولیس سروس آف پاکستان کے گریڈ 21 کے افسر ہیں اور اس وقت حکومت پنجاب میں صوبائی پولیس افسر کے طور پر خدمات انجام دے رہے تھے، انہیں فوری طور پر ایف آئی اے ایکٹ 1974 کی متعلقہ شقوں کے تحت ڈائریکٹر جنرل ایف آئی اے تعینات کر دیا گیا ہے۔

دوسری جانب پنجاب پولیس کے بیان میں کہا گیا ہے کہ وفاقی حکومت نے باضابطہ نوٹیفکیشن جاری کر کے پولیس سروس آف پاکستان کے 24ویں کامن سے تعلق رکھنے والے تجربہ کار افسر راؤ عبد الکریم کو انسپکٹر جنرل پنجاب پولیس مقرر کر دیا ہے۔

بیان کے مطابق راؤ عبد الکریم اپنی پیشہ ورانہ مہارت، فرض شناسی اور شاندار کیریئر کے باعث جانے جاتے ہیں اور اس تقرری سے قبل وہ ایڈیشنل آئی جی اسپیشل برانچ پنجاب کے اہم عہدے پر فائز تھے۔ پنجاب پولیس نے امید ظاہر کی ہے کہ ان کی متحرک قیادت میں شہریوں کے جان و مال کے تحفظ کے لیے نمایاں کامیابیاں حاصل ہوں گی۔