صدر ڈونلڈ ٹرمپ نے پیر کو اعلان کیا کہ انہوں نے بھارت کے ساتھ ایک تجارتی معاہدے پر اتفاق کرلیا ہے جس کے تحت بھارتی مصنوعات پر امریکی ٹیرف کو 50 فیصد سے کم کر کے 18 فیصد کر دیا جائے گا۔ اس کے بدلے میں بھارت روسی تیل کی خریداری بند کرے گا اور امریکہ اور ممکنہ طور پر وینزویلا سے تیل خریدے گا۔

بھارت کیلئے نیا باہمی ٹیرف پاکستان کے مقابلے میں 1 فیصد کم ہے۔ اگست 2025 میں امریکی انتظامیہ نے پاکستانی مصنوعات کی وسیع رینج پر 19 فیصد باہمی ٹیرف نافذ کیا تھا جو کہ ابتدائی طور پر تجویز کردہ 29 فیصد سے کم تھا۔

امریکی صدر ڈونلڈ ٹرمپ نے بھارتی وزیراعظم نریندر مودی کے ساتھ ٹیلی فونک رابطے کے بعد سوشل میڈیا پوسٹ میں کہا کہ وزیراعظم مودی کی درخواست پر ہم نے فوری طور پر امریکہ اور بھارت کے درمیان تجارتی معاہدے پر اتفاق کرلیا ہے جس کے تحت بھارت پر عائد ٹیرف کو کم کرکے 18 فیصد کیا جارہا ہے۔

وائٹ ہاؤس کے ایک عہدیدار نے خبر رساں ادارے رائٹرز کو بتایا کہ امریکہ، روسی تیل کی خریداری کی پاداش میں بھارتی درآمدات پر عائد 25 فیصد ڈیوٹی کو منسوخ کررہا ہے جو پہلے سے نافذ العمل 25 فیصد باہمی ٹیرف کے علاوہ لگائی گئی تھی۔

ٹرمپ نے کہا کہ بھارتی وزیر اعظم مودی نے500 ارب ڈالر سے زائد مالیت کی امریکی توانائی،ٹیکنالوجی اور دیگر اشیا خریدنے پراتفاق کیا ہے۔

بھارتی وزیر اعظم نریندر مودی نے سوشل میڈیا پلیٹ فارم ایکس پر اپنی ایک پوسٹ میں کہا کہ آج اپنے عزیز دوست صدر ٹرمپ کے ساتھ بات کر کے بہت خوشی ہوئی۔ مجھے یہ جان کر بے حد مسرت ہوئی ہے کہ اب میڈ ان انڈیا مصنوعات پر ٹیرف کم ہو کر 18 فیصد رہ جائے گا۔ اس شاندار اعلان پر بھارت کے 1.4 ارب عوام کی جانب سے صدر ٹرمپ کا بہت شکریہ۔

اس خبر کے سامنے آتے ہی امریکہ میں لسٹڈ بڑی بھارتی کمپنیوں کے حصص میں تیزی دیکھی گئی۔ دوپہر کے کاروبار کے دوران آئی ٹی فرم انفوسس کے حصص میں 3.53 فیصد، وِپرو میں 7 فیصد اور ایچ ڈی ایف سی بینک میں 3.4 فیصد اضافہ ہوا جبکہ آئی شیئرز ایم ایس سی آئی انڈیا ای ٹی ایف میں 3.3 فیصد کی بہتری ریکارڈ کی گئی۔