حالیہ مہینوں میں ایران میں حکومت مخالف مظاہروں کے خلاف سخت کریک ڈاؤن کے بعد کشیدگی میں اضافہ ہوا ہے۔ ٹرمپ پہلے ہی فوجی کارروائی کی دھمکی دے چکے ہیں اور مشرق وسطیٰ کی جانب ایک طیارہ بردار بحری بیڑا بھیجنے کا حکم دے چکے ہیں۔

ایرانی سپریم لیڈر آیت اللہ خامنہ ای نے مظاہروں کو بغاوت سے تشبیہ دیتے ہوئے کہا کہ اگر امریکا نے جنگ مسلط کی تو یہ صرف ایران تک محدود نہیں رہے گی بلکہ پورے خطے کو لپیٹ میں لے لے گی۔ ان کا کہنا تھا کہ ایرانی عوام کو امریکی بیانات سے خوفزدہ نہیں ہونا چاہیے۔

ٹرمپ نے خامنہ ای کے بیان پر ردعمل دیتے ہوئے کہا کہ وہ اب بھی معاہدے کے لیے پرامید ہیں۔ ان کے مطابق اگر بات چیت کامیاب نہ ہوئی تو پھر صورت حال واضح ہو جائے گی۔

ادھر ایران کے وزیر خارجہ عباس عراقچی نے بھی ممکنہ غلط فہمیوں پر تشویش ظاہر کی، تاہم کہا کہ اگر امریکا منصفانہ معاہدے کے لیے سنجیدہ ہو تو مذاکرات کا امکان موجود ہے، بشرطیکہ ایران کے میزائل اور دفاعی پروگرام کو ایجنڈے میں شامل نہ کیا جائے۔

ایران میں حالیہ بدامنی کے دوران ہلاکتوں کی تعداد پر مختلف دعوے سامنے آ رہے ہیں، جس سے صورتحال مزید پیچیدہ دکھائی دے رہی ہے۔