اتوار کو جاری کیے گئے سروے کے مطابق تاکائچی کی لبرل ڈیموکریٹک پارٹی ممکنہ طور پر 465 میں سے 233 یا اس سے زیادہ نشستیں جیت سکتی ہے، جو موجودہ 198 نشستوں سے کافی زیادہ ہے۔ سروے کے مطابق حکومتی اتحاد، جس میں ایل ڈی پی کے ساتھ جاپان انوویشن پارٹی بھی شامل ہے، مجموعی طور پر تقریباً 300 نشستیں حاصل کر سکتا ہے۔

سیکورٹیز کے سینئر بانڈ ماہر کیسُکے تسورُتا نے کہا کہ زبردست فتح سے تاکائچی کی حکمرانی مضبوط ہوگی اور ممکن ہے کہ وہ بڑھتے ہوئے اخراجات اور ٹیکس میں کمی جیسی پالیسیوں کو آگے بڑھائے، جس سے سرمایہ کاروں میں مالی نظم و ضبط کے حوالے سے خدشات بڑھ سکتے ہیں۔

منگل کو جاپانی گورنمنٹ بانڈ کی ییلڈز میں اضافہ دیکھا گیا کیونکہ سرمایہ کار اس بات کا اندیشہ رکھتے ہیں کہ تاکائچی کو وسیع مالیاتی پالیسی کے نفاذ کا مینڈیٹ مل سکتا ہے۔

سروے میں بتایا گیا کہ اہم حزب اختلاف، سینٹرِسٹ ریفارم الائنس، کو نقصان کا سامنا ہے اور وہ اپنی 167 نشستوں میں سے آدھی کھو سکتی ہے۔ تاکائچی نے اقتصادی بحالی کے لیے فوری انتخابات طلب کیے تھے، جس میں وہ اخراجات بڑھانے اور ٹیکس کم کرنے کی پالیسیوں کی حمایت چاہتی ہیں۔

گذشتہ ماہ تاکائچی کی جانب سے خوراک پر 8 فیصد ٹیکس معطل کرنے کے اعلان کے بعد مارکیٹ میں مندی آئی تھی، جس سے عوامی قرضے کے بارے میں تشویش مزید بڑھ گئی ہیں۔ زیادہ تر دیگر جماعتوں نے بھی صارفین کے ٹیکس میں کمی یا معطلی کا مطالبہ کیا ہے تاکہ بڑھتے ہوئے اخراجات زندگی پر اثر کم کیا جا سکے۔