وفاقی وزیر اطلاعات و نشریات عطا اللہ تارڑ نے جمعرات کو وضاحت کی تھی کہ پاکستان انسٹی ٹیوٹ آف میڈیکل سائنسز میں کامیاب آپریشن کے بعد عمران خان کی صحت بہتر ہے۔ یہ بیان پی ٹی آئی کی جانب سے سابق وزیر اعظم کی آنکھ کے عارضے پر تشویش ظاہر کیے جانے کے بعد سامنے آیا۔

وزیر اطلاعات کے مطابق ایک ماہر امراض چشم نے پہلے اڈیالہ جیل کے اندر عمران خان کا معائنہ کیا تھا۔ ماہر کی سفارش پر معمولی نوعیت کے طبی علاج کے لیے انہیں گزشتہ ہفتے ہفتہ کی رات پمز منتقل کیا گیا۔

آج سپریم کورٹ کے باہر میڈیا سے گفتگو کرتے ہوئے خیبر پختونخوا کے وزیراعلیٰ سہیل آفریدی نے کہا کہ حکومت نے عمران خان کی آنکھ کا علاج پمز میں کرایا، جہاں ریٹینا اسپیشلسٹ موجود نہیں۔ انہوں نے اسے تشویشناک قرار دیا۔ ان کا کہنا تھا کہ بیماری کے بعد عمران خان کا شاید چند بار طبی معائنہ ہوا، لیکن نہ خاندان کو آگاہ کیا گیا اور نہ ہی ذاتی معالج کو کچھ بتایا گیا۔

انہوں نے کہا کہ کئی روز تک انکار کے بعد بالآخر حکومتی وزیر نے علاج کی تصدیق کی۔ انہوں نے امید ظاہر کی کہ عمران خان کی جلد اپنے ذاتی ڈاکٹر سے ملاقات کرائی جائے گی۔

پی ٹی آئی کے سینئر رہنما سلمان اکرم راجہ نے کہا کہ عمران خان کو بنیادی حقوق فراہم نہیں کیے جا رہے اور آنکھ کے علاج کو خفیہ رکھا گیا۔ ان کے مطابق عدالتی حکم کے تحت ملاقات کا دن ہونے کے باوجود کسی کو عمران خان سے ملنے نہیں دیا گیا۔

انہوں نے بتایا کہ عمران خان کے ذاتی معالج، شوکت خانم کے چیف میڈیکل آفیسر ڈاکٹر عاصم یوسف اور ریٹینا ماہر خرم مرزا لاہور سے آئے مگر انہیں بھی اڈیالہ جیل کے باہر دو گھنٹے انتظار کے بعد ملاقات کی اجازت نہیں ملی۔ انہوں نے زور دیا کہ عمران خان کا ریٹینا ماہر سے معائنہ کرانا ناگزیر ہے۔