لسٹڈ کمپنی نے اسٹاک ایکسچینج کو بھیجے گئے اپنے نوٹس میں اس پیشرفت سے آگاہ کیا ۔

اے وی این نے بتایا کہ یہ تزویراتی کامیابیاں نہ صرف صارفین کیلئے آپریشنز کو سہل بنائیں گی بلکہ جدید آٹومیشن اور ڈیجیٹلائزیشن کے ذریعے ان کے مجموعی منافع میں بھی نمایاں بہتری لائیں گی۔

نوٹس کے مطابق اس ٹیکنالوجی کمپنی کو توانائی شعبے کے منصوبوں کیلئے مجموعی طور پر 5.7 ملین ڈالر مالیت کا لیٹر آف انٹینٹ جاری کیا گیا ہے۔

کمپنی ٹرمینل آٹومیشن اور ٹرانسفارمیشن کے ایسے اقدامات فراہم کرے گی جن میں شمسی توانائی سے چلنے والے کنٹرول سسٹمز، پائیدار مواصلاتی نظام، مرکزی اسکیڈا انٹیگریشن اور آئی ای سی 62443 کے معیار کے مطابق سائبر سیکیورٹی شامل ہوگی۔

ایوانسیون نے ہاسپیٹلٹی، ریٹیل اور ریئل اسٹیٹ کے شعبوں میں بھی 3.3 ملین ڈالر کے نئے پروجیکٹس حاصل کیے ہیں۔

ان منصوبوں میں ایڈوانسڈ ای ایل وی، بی ایم ایس، فائر الارم، گیسٹ روم مینجمنٹ اور آئی ٹی نیٹ ورک سلوشنز کی فراہمی شامل ہے۔

یہ تزویراتی سنگِ میل ہاسپیٹلٹی آٹومیشن کی مارکیٹ میں ایوانسیون کے داخلے کی نشاندہی کرتا ہے جو اسمارٹ بلڈنگز اور ڈیجیٹل انفرااسٹرکچر کے شعبوں میں کمپنی کی طویل مدتی ترقی کے سفر کو مزید مستحکم کرے گا۔

کمپنی نے مزید کہا کہ یہ منصوبے گروپ کے کاروبار پر مثبت اثرات اور ہمارے شیئر ہولڈرز کیلئے منافع بخش قدر فراہم کرنے کی راہ ہموار کرتے ہیں۔

ایوانسیون لمیٹڈ 26 مارچ 2003 کو پاکستان میں بطور پرائیویٹ لمیٹڈ کمپنی رجسٹرڈ ہوئی تھی، جسے 31 مارچ 2008 کو منسوخ شدہ ’کمپنیز آرڈیننس 1984‘ کے تحت پبلک کمپنی میں تبدیل کر دیا گیا۔

کمپنی کی بنیادی سرگرمی آٹومیشن اور کنٹرول کے آلات کی تجارت کرنا اور ان سے متعلقہ تکنیکی خدمات فراہم کرنا ہے۔