حکام کا کہنا ہے کہ ملک میں 5 جی سروسز کے باسہولت آغاز کے لیے تیاریوں کو تیز کر دیا گیا ہے۔

ان کوششوں کے حصے کے طور پر مقامی اسمبلرز اب تک تقریباً 5 لاکھ (0.5 ملین) 5 جی ہینڈ سیٹس تیار کر چکے ہیں، جو کہ تجارتی آغاز سے قبل ڈیوائسز کی سطح پر ابتدائی تیاریوں کی عکاسی کرتا ہے۔

حکومت مینوفیکچررز پر زور دے رہی ہے کہ وہ تقریباً 30 ہزار روپے سے شروع ہونے والے سستے 5 جی اسمارٹ فونز کی دستیابی کو یقینی بنائیں، تاکہ زیادہ سے زیادہ لوگ اس ٹیکنالوجی کو اپنا سکیں۔

حکام کے مطابق اسپیکٹرم کی نیلامی اگلے ماہ کے آخر تک شیڈول ہے، جبکہ آئندہ پانچ ماہ کے اندر بڑے شہروں میں 5 جی سروسز شروع ہونے کی توقع ہے، جس کے بعد مرحلہ وار اسے ملک کے دیگر حصوں تک پھیلایا جائے گا۔

نیٹ ورک کی تنصیب اور ہینڈ سیٹس کی دستیابی میں ہم آہنگی پیدا کرنے کے لیے پاکستان ٹیلی کمیونیکیشن اتھارٹی (پی ٹی اے) سمیت اعلیٰ سرکاری حکام نے موبائل ڈیوائس مینوفیکچررز (ایم ڈی ایم) ایسوسی ایشن کے نمائندوں سے ملاقات کی، جو پاکستان میں کام کرنے والے تقریباً 35 اسمبلرز اور مینوفیکچررز کی نمائندگی کرتی ہے۔ اجلاس کو بتایا گیا کہ سام سنگ، ویوو اور اوپو سمیت پانچ کمپنیاں پہلے ہی فائیوجی ہینڈ سیٹس تیار کر رہی ہیں جبکہ دیگر کمپنیاں بھی اس حوالے سے کام شروع کرنے کے لیے تیار ہیں۔

ماضی میں 5 جی سروسز کی عدم موجودگی کے باعث ان ہینڈ سیٹس کی طلب نہیں تھی، تاہم اب حکومت کی جانب سے سروسز شروع کرنے کے فیصلے کے بعد ان کی تیاری کے کام میں تیزی آ گئی ہے۔ حکام کا کہنا ہے کہ جب ملک میں 5 جی سروسز کا آغاز ہوگا تو مارکیٹ میں ہینڈ سیٹس کی کوئی کمی نہیں ہوگی۔ ملاقات کے دوران حکومت نے صنعت کاروں کو ریگولیٹری اور آپریشنل رکاوٹیں دور کرنے، درآمدی مراحل میں سہولت فراہم کرنے اور سرٹیفکیٹ آف کنفارمیٹی (CoC) کے بروقت اجرا کی یقین دہانی کرائی۔

حکام نے اس بات پر زور دیا کہ 5 جی کے آغاز سے قبل ہینڈ سیٹس کے اہداف کو پورا کرنے کے لیے سپلائی چین کا تسلسل اور ریگولیٹری استحکام انتہائی اہم ہے۔ حکومت نے مینوفیکچررز کو باقاعدہ تجویز دی ہے کہ وہ معاشی حالات کے پیشِ نظر صارفین پر مالی بوجھ کم کرنے کے لیے قسطوں پر خریداری کے اختیارات متعارف کرائیں۔

شرکاء نے اس تجویز کا خیرمقدم کیا اور حکام کو یقین دلایا کہ وہ 30 ہزار روپے سے شروع ہونے والے مقامی طور پر تیار کردہ 5 جی ہینڈ سیٹس مارکیٹ میں لائیں گے اور طلب کو پورا کرنے کے لیے پیداوار میں اضافہ کریں گے۔

حکام نے واضح کیا کہ اسپیکٹرم کی الاٹمنٹ اور نیٹ ورک کی تیاری کے ساتھ ساتھ سستی ڈیوائسز کی دستیابی پاکستان میں 5 جی کے کامیاب آغاز کے لیے کلیدی حیثیت رکھتی ہے۔