سوئٹزرلینڈ کے شہر ڈیووس میں ورلڈ اکنامک فورم کے سالانہ اجلاس کے موقع پر وفاقی وزیر خزانہ سینیٹر محمد اورنگزیب کی زیر صدارت ایک ہائی لیول بزنس راؤنڈ ٹیبل میں نیسلے کے ایگزیکٹو وائس پریزیڈنٹ اور سی ای او (ایشیا، اوشیانا اور افریقہ) ریمی ایجل نے اس پیشرفت کا اعلان کیا۔

انہوں نے پاکستان کے ساتھ طویل مدتی وابستگی کا اعادہ کرتے ہوئے کہا کہ نیسلے پاکستان کو ایک علاقائی مینوفیکچرنگ اور ایکسپورٹ حب کے طور پر استعمال کرنے کا ارادہ رکھتی ہے، جہاں سے 26 ممالک کو مصنوعات برآمد کی جائیں گی۔

ریمی ایجل نے آنے والے برسوں میں پاکستان میں کاروبار کی مضبوط ترقی کی پیش گوئی کی اور کہا کہ پاکستان کی آبادی اور غذائی ضروریات جنوب مشرقی ایشیا کی کامیاب مارکیٹوں سے مماثلت رکھتی ہیں۔ انہوں نے بتایا کہ نیسلے 180 سے زائد ممالک میں کام کر رہی ہے اور 2025 میں اس کی عالمی آمدنی تقریباً 114.25 ارب ڈالر رہی۔

وزیر خزانہ محمد اورنگزیب نے اس سرمایہ کاری کا خیرمقدم کرتے ہوئے اسے پاکستان کی معاشی اصلاحات پر بھرپور اعتماد کا اظہار قرار دیا۔ انہوں نے نجی شعبے کے ساتھ تعاون، ٹیکس نظام کی بہتری اور پالیسیوں میں تسلسل برقرار رکھنے کی یقین دہانی کرائی۔ گزشتہ ماہ نیسلے پاکستان کے سی ای او جیسن ایوانسینا نے بھی شیخوپورہ اور خانیوال میں موجود فیکٹریوں کی جدید آٹومیشن کا ذکر کرتے ہوئے انہیں عالمی معیار کے برابر قرار دیا تھا۔