برینٹ کروڈ فیوچرز کی قیمت پانچ سینٹ کمی کے ساتھ 63.29 ڈالر فی بیرل پر آ گئی، جبکہ امریکی ویسٹ ٹیکساس انٹرمیڈیٹ خام تیل چھ سینٹ گر کر 59.06 ڈالر فی بیرل پر ٹریڈ ہوا۔ گزشتہ ہفتے دونوں بینچ مارکس میں تین فیصد سے زائد اضافہ ہوا تھا، جو اکتوبر کے بعد سب سے بڑا ہفتہ وار اضافہ تھا، جس کی بنیادی وجہ ایران میں مذہبی حکومتی ڈھانچے کے سخت ردعمل کے باعث 2022 کے بعد ایک بار پھر بڑے پیمانے پر پرتشدد مظاہرے تھے۔

توانائی مارکیٹ کے تجزیہ کاروں کے مطابق حالیہ دنوں میں خام تیل کی قیمتوں میں جغرافیائی سیاسی خطرات کے باعث ایک اضافی قیمت شامل ہوئی ہے، لیکن عالمی بازار اب بھی ممکنہ اثرات کا اندازہ کم کر رہا ہے۔ ان کا کہنا ہے کہ جب تک تیل کی سپلائی میں حقیقی تعطل سامنے نہیں آتا، مارکیٹ میں بڑا ردعمل ممکن نہیں۔

ایران میں بدامنی کے دوران ایک انسانی حقوق گروپ کے مطابق 500 سے زیادہ افراد ہلاک ہو چکے ہیں، جبکہ ملک کے اہم تیل شعبے میں ہڑتال کی اپیلیں بھی سامنے آئی ہیں، جس سے روزانہ 1.9 ملین بیرل تک برآمدات متاثر ہونے کا خطرہ ہے۔

اسی دوران وینزویلا میں صدر نکولس مادورو کے اقتدار سے ہٹائے جانے کے بعد توقع کی جا رہی ہے کہ ملک جلد تیل کی فروخت دوبارہ شروع کر دے گا۔ امریکی صدر ڈونلڈ ٹرمپ نے کہا ہے کہ کاراکاس حکومت امریکہ کو تقریباً 50 ملین بیرل تیل سپرد کرے گی، جس کے بعد کئی کمپنیوں نے تیل کی محفوظ نقل و حمل کے لیے جہاز اور لاجسٹکس انتظام کرنے کی تیاریاں تیز کر دی ہیں۔

تجزیہ کاروں کے مطابق ایران میں عدم استحکام کی شدت بڑھنے کی صورت میں قیمتوں میں واضح اضافہ ممکن ہے، مگر فی الحال وینزویلا سے سپلائی کی بحالی نے عالمی منڈیوں کو کچھ حد تک متوازن رکھا ہوا ہے۔