سماجی پلیٹ فارم ٹروتھ سوشل پر جاری بیان میں ٹرمپ نے کہا کہ پابندی کے لیے فوری اقدامات کیے جا رہے ہیں اور وہ کانگریس سے اس اقدام کو قانون بنانے کی درخواست کریں گے۔ انہوں نے مزید بتایا کہ وہ ڈیوس ورلڈ اکنامک فورم میں اپنی تقریر کے دوران رہائش کی دستیابی سے متعلق مزید اقدامات کا اعلان بھی کریں گے۔ ان کا کہنا تھا کہ گھر کا مالک ہونا طویل عرصے سے امریکی خواب کی علامت رہا ہے، لیکن بڑھتی مہنگائی نے لاکھوں امریکیوں کے لیے یہ خواب مشکل بنا دیا ہے۔ انہوں نے کہا کہ لوگ گھروں میں رہتے ہیں، کمپنیاں نہیں۔

ٹرمپ کا اقدام ایسے وقت میں سامنے آیا ہے جب یہ الزامات مسلسل بڑھ رہے ہیں کہ وال اسٹریٹ کی سرمایہ کاری نے رہائشی گھروں کی فراہمی کم کر دی اور کرائے کی شرحیں بڑھا دیں۔ 2008 کے مالیاتی بحران کے بعد سے بلیک اسٹون جیسی کمپنیاں ہزاروں گھر خرید کر انہیں کرائے پر دینے کے شعبے میں تبدیل کر چکی ہیں، جس نے رہائشی مارکیٹ میں بڑے پیمانے پر تجارتی داخلے کی راہ ہموار کی۔

ٹرمپ کے بیان کے بعد ہاؤسنگ مارکیٹ میں سرمایہ کاری کرنے والی کمپنیوں کے شیئرز لڑکھڑا گئے۔ امریکن ہومز فور رینٹ کے حصص تقریباً تین سال کی کم ترین سطح تک گر گئے جبکہ بلیک اسٹون کے شیئرز میں بھی نمایاں کمی دیکھی گئی۔ رہائشی ہاؤسنگ انڈیکس میں دو فیصد سے زائد کمی ریکارڈ کی گئی جو گزشتہ کئی ہفتوں کے مقابلے میں سب سے بڑی روزانہ گراوٹ تھی۔

ٹرمپ نے یہ واضح نہیں کیا کہ اس پابندی کے لیے وہ کس قانونی اختیار کا استعمال کریں گے، نہ ہی پالیسی کی درست تفصیلات سامنے آئیں۔ تاہم وہ دن کے آخر تک ایگزیکٹو آرڈر پر دستخط کرنے والے ہیں۔

انتخابات سے پہلے بڑھتی مہنگائی اور رہائش کے بڑھتے خرچ کے باعث ٹرمپ پر عوامی دباؤ بھی بڑھ رہا ہے۔ اگرچہ رہائشی قیمتوں اور کرایوں میں حالیہ مہینوں میں کچھ کمی آئی ہے، لیکن امریکی شہری گھروں کی کمی اور لاگت سے متعلق تشویش میں مبتلا ہیں۔