یہ تجارتی استحکام اس وقت دیکھنے میں آیا جب اسلام آباد کے ساتھ کشیدگی نے طویل عرصے سے قائم ٹرانزٹ راستوں کو متاثر کیا، جو خشکی سے گھرے افغانستان کیلئے سمندری بندرگاہوں تک رسائی کا بنیادی ذریعہ رہے ہیں۔

تاجروں نے اس کے مقابلے میں ایران کی چاہ بہار بندرگاہ کے ذریعے سامان کی نقل و حمل میں اضافہ کیا اور ازبکستان، ترکمانستان اور تاجکستان کے راستے زمینی تجارت کو وسعت دی، جس سے تاخیر اور سیاسی غیر یقینی صورتحال کے اثرات کم ہوئے۔

وزارت تجارت کے مطابق 2025 میں افغانستان کی مجموعی تجارت — یعنی برآمدات اور درآمدات کی مجموعی مالیت — بڑھ کر تقریباً 13.9 ارب ڈالر تک پہنچ گئی۔ برآمدات کا اندازہ تقریباً 1.8 ارب ڈالر لگایا گیا، جو گزشتہ سال کے قریب ہی رہی، جبکہ درآمدات بڑھ کر 12.1 ارب ڈالر سے کچھ زیادہ ہو گئیں۔

بھارت، پاکستان اور چند وسطی ایشیائی ممالک افغانستان کی بڑی منڈیوں میں شامل رہے، جہاں خشک میوہ جات، کوئلہ، قالین، زعفران اور زرعی پیداوار اہم برآمداتی اشیا رہیں۔

درآمدات زیادہ تر ایندھن، مشینری، غذائی ضروریات اور صنعتی خام مال پر مشتمل تھیں، جن کا بڑا حصہ ایران، متحدہ عرب امارات، چین اور خطے کے دیگر پڑوسی ممالک سے آیا۔

سرحدی بندشوں اور سکیورٹی سے جڑے مسائل کے بعد افغانستان پاکستان پر انحصار کم کرنے کی کوششیں تیز کر رہا ہے۔ اگرچہ سمندر تک پہنچنے کیلئے پاکستان اب بھی مختصر ترین راستہ ہے، تاہم افغان حکام کا کہنا ہے کہ تجارتی راہداریوں میں تنوع نے کاروباری سرگرمیوں کو برقرار رکھنے میں مدد دی ہے، خواہ مشرقی پڑوسی کے ساتھ تعلقات کشیدہ ہی کیوں نہ ہوں۔