وفاقی وزیر برائے بحری امور جنید انور چوہدری نے شپ یارڈ میں منعقدہ اسٹیل کٹنگ کی تقریب میں اس منصوبے کا باقاعدہ افتتاح کیا۔ تقریب سے خطاب کرتے ہوئے وفاقی وزیر نے کہا کہ یہ کنٹینر جہاز مکمل طور پر مقامی وسائل کا استعمال کرتے ہوئے تعمیر کیا جائے گا، جو پاکستان کی جہاز سازی کی صنعت پر بڑھتے ہوئے اعتماد کی عکاسی کرتا ہے۔

انہوں نے مزید کہا کہ یہ منصوبہ غیر ملکی زرِ مبادلہ بچانے کے ساتھ ساتھ پی این ایس سی کے بیڑے کی آپریشنل صلاحیت کو بڑھانے میں بھی مددگار ثابت ہوگا۔

جنید انور چوہدری کا کہنا تھا کہ سپلائی چین کو مضبوط بنانے اور ملک بھر میں تجارتی سرگرمیوں کو فروغ دینے کے لیے قومی بحری بیڑے میں توسیع ناگزیر ہے۔

انہوں نے اس بات پر بھی زور دیا کہ جہاز سازی کا یہ اقدام ہنر مند کارکنوں کے لیے روزگار کے مواقع پیدا کرے گا اور بحری افرادی قوت کی ترقی میں اپنا حصہ ڈالے گا۔

وفاقی وزیرِ نے مزید کہا کہ کراچی شپ یارڈ قومی بحری ترقی کے ایک اہم مرکز کے طور پر ابھر رہا ہے۔انہوں نے مزید کہا کہ جہاز سازی اور ان کی مرمت پاکستان کی بحری پالیسی کے مرکزی ستون ہیں۔ اس شعبے کی اہمیت کو اجاگر کرتے ہوئے انہوں نے بتایا کہ پاکستان کی تقریباً 95 فیصد تجارت سمندری راستوں سے ہوتی ہے، جو پائیدار اقتصادی ترقی کے لیے ایک مضبوط اور خود انحصار بحری صنعت کی ضرورت کو واضح کرتی ہے۔