یہ منظوری پیر کے روز وزیراعلیٰ سہیل آفریدی کی زیر صدارت صوبائی کابینہ کے 45ویں اجلاس میں دی گئی۔ اجلاس میں تمام صوبائی وزرا اور مختلف محکموں کے انتظامی سیکریٹریز نے شرکت کی۔ کابینہ اجلاس میں گورننس اصلاحات، سماجی بہبود، صحت، تعلیم، نوجوانوں کی ترقی اور اوورسیز پاکستانیوں سے متعلق متعدد اہم فیصلے کیے گئے۔

میڈیا کو بریفنگ دیتے ہوئے وزیراعلیٰ خیبرپختوںخوا کے معاون خصوصی برائے اطلاعات و تعلقات عامہ شفیع جان نے کہا کہ اوورسیز پاکستانی ملکی معیشت میں کلیدی کردار ادا کرتے ہیں اور ان کے حقوق اور املاک کا تحفظ صوبائی حکومت کی اہم ذمہ داری ہے۔ انہوں نے کہا کہ خصوصی عدالتوں کے قیام سے اوورسیز پاکستانیوں کو درپیش جائیداد سے متعلق تنازعات کے جلد اور مؤثر حل میں مدد ملے گی۔

کابینہ نے ایکسائز، ٹیکسیشن اینڈ نارکوٹکس کنٹرول ڈیپارٹمنٹ کے عملے کے لیے پولیس طرز کے شہدا پیکیج کی تجویز کو کابینہ کمیٹی کو بھیجنے کا فیصلہ کیا۔ اس کے ساتھ دیگر یونیفارمڈ فورسز کے شہدا کو بھی یکساں پالیسی میں شامل کرنے کی ہدایت دی گئی۔

اجلاس میں اسپیشل ایجوکیشن کمپلیکس حیات آباد کے لیے بسوں کی خریداری کی منظوری دی گئی جبکہ زمونگ کور منصوبے کے تحت زیر کفالت بچوں کے لیے ٹرانسپورٹ سہولیات فراہم کرنے کی ہدایات بھی جاری کی گئیں۔

سردیوں کے موسم کے پیش نظر محکمہ سماجی بہبود کو بے گھر افراد کے لیے خصوصی اقدامات کرنے اور سیاحتی مقامات پر سیاحوں کے لیے مناسب انتظامات یقینی بنانے کی ہدایت دی گئی۔

کابینہ نے محکمہ آبپاشی کو ڈی سلٹنگ مہم کے لیے 900 ملین روپے جاری کرنے کی منظوری دی اور اس مہم کو شفاف اور منظم انداز میں چلانے کی ہدایت کی، تاکہ ممکنہ سیلابی نقصانات کو کم کیا جا سکے۔

نوجوانوں کی سرگرمیوں کے فروغ کے لیے گرینڈ کرم یوتھ کنونشن کے انعقاد کے لیے 6 ملین روپے کی منظوری دی گئی اور دیگر اضلاع میں بھی ایسے کنونشنز منعقد کرنے کی ہدایت کی گئی۔

کابینہ نے نیشنل پارکس، وائلڈ لائف منصوبوں، ضم شدہ اضلاع کے فاریسٹ اسٹاف اور صوبائی محتسب کے دفتر کے لیے گاڑیوں کی خریداری کی بھی منظوری دی۔ اس کے علاوہ تمام محکموں کو سرکاری گاڑیوں اور ان کے سالانہ اخراجات کی تفصیلات ایک ہفتے میں جمع کرانے کی ہدایت کی گئی۔

اجلاس میں کیڈٹ کالج لکی مروت کو خیبر پختونخوا ایجوکیشنل اینڈ ٹریننگ انسٹی ٹیوشنز آرڈیننس 1971 کے تحت لانے اور کالجز کے لائبریرینز کی اپ گریڈیشن کے لیے چار سطحی فارمولے کی بھی منظوری دی گئی۔

کاپی رائٹ بزنس ریکارڈر، 2026