یہ وضاحت اس کے بعد سامنے آئی ہے کہ میڈیا رپورٹس میں کمپنی کی جانب سے پاکستانی اینٹیمنی حاصل کرنے کے انتظامات کا ذکر کیا گیا تھا۔

نووا منرلز نے اسٹاک ایکسچینج کو آگاہ کیا کہ اینٹیمنی کانسٹریٹ کے حصول سے متعلق ابتدائی بات چیت صرف ٹیسٹنگ کے مقاصد کے لیے کی گئی ہے اور تمام گفتگو تحقیقی نوعیت کی ہے۔

کمپنی نے مزید کہا کہ سال 2026 میں نووا کی توجہ اپنے سونے کے اثاثوں کے لیے فزیبلٹی اسٹڈی مکمل کرنے اور ملٹری گریڈ اینٹیمنی ٹرائی سلفائیڈ کی پیداوار شروع کرنے پر مرکوز رہے گی، جس کے لیے امریکی محکمہ دفاع کی جانب سے حال ہی میں دیے گئے 43.4 ملین ڈالر کے ایوارڈ کا تعاون حاصل ہے۔

رپورٹ کے مطابق گزشتہ ماہ برطانوی اخبار فنانشل ٹائمز نے بتایا کہ پاکستان میں قائم ہمالین ارتھ ایکسپلوریشن کمپنی نے نووا منرلز کے ساتھ اینٹیمنی کی تلاش کیلئے اسٹریٹجک پارٹنرشپ پر دستخط کیے جس کا مقصد امریکہ اور پاکستان کے درمیان معاشی تعلقات کو مضبوط بنانا ہے۔

نومبر میں بورڈ آف انویسٹمنٹ نے نووا منرلز کے ایک وفد سے ملاقات کی، جس دوران کمپنی نے پاکستان کے معدنیات اور کان کنی کے شعبوں میں، خاص طور پر اینٹیمنی اور نایاب معدنیات میں سرمایہ کاری کے مواقع میں دلچسپی کا اظہار کیا۔

نیووا کے چیف ایگزیکٹو کرسٹوفر گرتیزن نے فنانشل ٹائمز کو بتایا کہ کمپنی آئندہ سال کے آغاز میں تقریباً 2 ملین ڈالر میں پاکستانی اینٹیمنی کانسٹریٹ کے 100 ٹن سے زائد خریدے گی تاکہ اسے الاسکا میں ٹیسٹنگ اور پروسیسنگ کے لیے استعمال کیا جا سکے۔

انہوں نے کہا کہ مستقبل میں یہ ممکن ہے کہ پاکستان میں اس کان کی ڈاؤن اسٹریم پروسیسنگ بھی قائم کی جائے۔