برآمد کیے گئے سامان میں غیر ملکی چھالیہ، سگریٹ، ٹائر، کپڑا اور کمپیوٹر سرورز شامل ہیں۔ کسٹمز کے مطابق برآمد شدہ سامان کی تخمینہ قیمت 183.23 ملین روپے لگائی گئی ہے۔ یہ آپریشنز ٹھوس انٹیلی جنس معلومات پر کیے گئے، جو اسمگلنگ کی روک تھام اور قومی معیشت کے تحفظ کے لیے کسٹمز انفورسمنٹ کوئٹہ کے پختہ عزم کی عکاسی کرتے ہیں۔

اعلامیے میں مزید کہا گیا کہ بلوچستان کے قانون نافذ کرنے والے اداروں کے ساتھ بروقت تعاون اور موثر ہم آہنگی نے ان آپریشنز کی کامیابی میں کلیدی کردار ادا کیا۔

ایف بی آر نے اسمگلنگ، غیر قانونی تجارت اور کرپشن کے خلاف سخت کارروائیاں جاری رکھنے کے عزم کا اعادہ کیا ہے، تاکہ قانون کی بالادستی اور قومی معاشی مفادات کا تحفظ یقینی بنایا جا سکے۔

واضح رہے کہ اس سے قبل 27 دسمبر کو بھی کسٹمز انفورسمنٹ کوئٹہ نے مختلف کارروائیوں میں 31 کروڑ 70 لاکھ روپے مالیت کا ممنوعہ سامان قبضے میں لیا تھا، جس میں صرف سگریٹوں کی مالیت 20 کروڑ روپے تھی۔