جیو نیوز کے پروگرام کیپیٹل ٹاک میں گفتگو کرتے ہوئے رانا ثناء اللہ نے کہا کہ اعتماد سازی کے اقدامات ہونے چاہئیں اور ملک کے پانچ بڑوں کے درمیان رابطہ قائم ہونا چاہیے۔ ان میں سے دو میرے لیڈر میاں نواز شریف اور وزیراعظم شہباز شریف ہیں، تیسرے صدر آصف علی زرداری، چوتھے عمران خان اور پانچویں شخصیت کے بارے میں میرا خیال ہے کہ ہر کوئی جانتا ہے۔

مسلم لیگ (ن) کے سینیٹر نے پی ٹی آئی سے یہ مطالبہ بھی کیا کہ وہ مسلح افواج اور عسکری قیادت کے خلاف سوشل میڈیا پر جاری توہین آمیز مہم کو فوری طور پر بند کرے۔ انہوں نے زور دیتے ہوئے کہا کہ اگر انہوں نے گالیاں ہی دینی ہیں تو سیاست دانوں کو دیں۔

اسی پروگرام میں گفتگو کرتے ہوئے پی ٹی آئی کے چیف وہپ ملک عامر ڈوگر نے کہا کہ حکام کو چاہیے کہ وہ اپوزیشن لیڈرز راجہ ناصر عباس اور محمود خان اچکزئی کو عمران خان سے ملنے کی اجازت دیں، جو پی ٹی آئی کے اتحادی ہیں مگر ان کا تعلق جماعت سے نہیں ہے۔ انہوں نے امید ظاہر کی کہ اگر رانا ثناء اللہ کی ذکر کردہ پانچوں شخصیات مل بیٹھیں تو تنازع ضرور ختم ہو جائے گا۔

یہ پیش رفت ایک ایسے وقت میں سامنے آئی ہے جب پی ٹی آئی اور حکومت کے درمیان شدید ڈیڈ لاک برقرار ہے۔ پی ٹی آئی قیادت کو 9 مئی 2023 کے پرتشدد واقعات سمیت متعدد مقدمات کا سامنا ہے، جنہیں عمران خان سیاسی انتقام قرار دیتے ہیں۔ عمران خان 2023 سے جیل میں ہیں اور ان پر کرپشن، زمین کے فراڈ اور سرکاری راز افشا کرنے جیسے الزامات کے تحت مقدمات چلائے جا رہے ہیں۔