کاروبار کے اختتام پر ڈالر کے مقابلے میں روپیہ ایک پیسے کی بہتری سے 280.16 روپے پر بند ہوا

یاد رہے کہ گزشتہ ہفتے روپیہ 8 پیسے کی بہتری سے 280.17 پر بند ہوا تھا۔

عالمی سطح پر پیر کو جاپانی ین کی قدر میں کچھ بہتری دیکھی گئی۔ یہ بہتری گزشتہ ہفتے کے اختتام پر ہونے والی بڑی گراوٹ کے بعد آئی ہے کیونکہ مارکیٹیں جاپان میں شرحِ سود میں مزید اضافے کے وقت اور سال کے آخری دنوں میں حکومتی مداخلت کے امکانات کا جائزہ لے رہی ہیں۔

بینک آف جاپان کے پالیسی سازوں نے دسمبر میں ہونے والی اپنی پالیسی میٹنگ میں شرح سود میں مزید اضافے کی ضرورت پر بحث کی۔

یورو (یورپی کرنسی) کو اس وقت سہارا ملا جب امریکی صدر ڈونلڈ ٹرمپ نے یوکرین میں جاری جنگ کے خاتمے کے لیے امن معاہدے تک پہنچنے کے مذاکرات میں پرامیدی کا اظہار کیا۔

وزیرِ خزانہ ستسوکی کاتایاما نے گزشتہ ہفتے کہا کہ ین کی قدر میں ہونے والے حد سے زیادہ اتار چڑھاؤ سے نمٹنے کے لیے جاپان کے پاس مکمل آزادانہ اختیار موجود ہے۔