عارف حبیب کارپوریشن نے پاکستان اسٹاک ایکسچینج کو نوٹس کے ذریعے بتایا کہ یہ حصول تمام ضروری منظوریوں سے مشروط ہے، جن میں نجکاری کمیشن کے بورڈ کی منظوری اور وفاقی کابینہ کا حتمی فیصلہ شامل ہے۔ منظوریاں ملنے کے بعد باقاعدہ طور پر لیٹر آف ایکسیپٹنس جاری کیا جائے گا جس میں کامیاب بولی دہندہ کا اعلان کیا جائے گا۔

عارف حبیب کارپوریشن لمیٹڈ کی قیادت میں قائم ہونے والے کنسورشیم (اتحاد) نے جس میں فاطمہ فرٹیلائزر کمپنی لمیٹڈ، دی لیک سٹی ہولڈنگز (پرائیویٹ) لمیٹڈ، اے کے ڈی گروپ ہولڈنگز (پرائیویٹ) لمیٹڈ اور سٹی اسکولز (پرائیویٹ) لمیٹڈ شامل ہیں، 23 دسمبر 2025 کو منعقد ہونے والے پاکستان انٹرنیشنل ایئرلائنز کارپوریشن لمیٹڈ کی نجکاری کے بولی کے عمل میں حصہ لیا۔

نوٹس کے مطابق عارف حبیب کارپوریشن کی زیرِ قیادت کنسورشیم کو 135 ارب روپے کی بولی کی قیمت جمع کرانے کے بعد سب سے بڑا بولی دہندہ قرار دے دیا گیا ہے۔ یہ بولی متعلقہ ٹرانزیکشن دستاویزات کے مطابق پی آئی اے میں 75 فیصد ایکویٹی اسٹیک (حصص) کے مرحلہ وار حصول کے لیے دی گئی ہے۔

کمپنی نے آگاہ کیا کہ نجکاری کے عمل کے تسلسل میں بولی کی قیمت ابھی ضروری منظوریوں سے مشروط ہے۔ ان میں نجکاری کمیشن کے بورڈ کی منظوریاں اور سفارشات، اور حکومتِ پاکستان/ وفاقی کابینہ کا حتمی فیصلہ شامل ہیں۔

مزید کہا گیا کہ ایسی تمام منظوریاں حاصل ہونے پر باقاعدہ طور پر لیٹر آف ایکسیپٹنس (قبولی نامہ) جاری کیا جائے گا جس میں کامیاب بولی دہندہ کا باقاعدہ اعلان کیا جائے گا۔

عارف حبیب کارپوریشن لمیٹڈ کی زیرِ قیادت کنسورشیم منگل کو پاکستان انٹرنیشنل ایئرلائنز کے 75 فیصد حصص کے حصول کے لیے کامیاب بولی دہندہ کے طور پر ابھرا ہے۔ اس گروپ نے 135 ارب روپے کی سب سے بڑی بولی جمع کرائی ہے جو کہ حکومت کی مقرر کردہ ریفرنس پرائس (کم از کم قیمت) سے 35 فیصد زیادہ ہے اور ساتھ ہی اگلے پانچ سالوں میں مزید 80 ارب روپے کی سرمایہ کاری کرنے کا عزم بھی ظاہر کیا ہے۔