سونے کی فی اونس قیمت عالمی مارکیٹ میں 1.7 فیصد اضافے کے ساتھ 4,411.01 ڈالر ریکارڈ کی گئی جو دن کے آغاز میں بننے والی 4,420.01 ڈالر کی تاریخی بلند ترین سطح سے قدرے نیچے ہے۔ امریکی گولڈ فیوچرز برائے فروری ڈیلیوری 1.3 فیصد بڑھ کر 4,444.00 ڈالر فی اونس ہو گئے۔

اس سال اب تک سونا 67 فیصد مہنگا ہو چکا ہے، متعدد ریکارڈ توڑتے ہوئے پہلی بار فی اونس 3,000 اور پھر 4,000 ڈالر کی سطح عبور کی، اور یہ 1979 کے بعد سب سے بڑی سالانہ بڑھوتری کے لیے تیار ہے۔

چاندی نے سال کی ابتدا سے اب تک 138 فیصد اضافہ کیا، جو سونے کی نسبت کہیں زیادہ ہے، جس کی بنیادی وجوہات مضبوط سرمایہ کاری کے بہاؤ اور مسلسل سپلائی کی کمی ہیں۔

اسٹون ایکس کے سینئر تجزیہ کار میٹ سمپسن کے مطابق دسمبر روایتی طور پر سونے اور چاندی کے لیے مثبت منافع لاتا ہے، تاہم چونکہ سونے کی قیمت اس ماہ پہلے ہی 4 فیصد بڑھ چکی ہے اور سال کا اختتام قریب ہے، سرمایہ کاروں کو محتاط رہنے کی ضرورت ہے کیونکہ حجم میں کمی اور منافع وصول کرنے کے امکانات بڑھ سکتے ہیں۔

رائٹرز کے تکنیکی تجزیہ کار وانگ تاؤ کا کہنا ہے کہ سونے کی قیمت نے 4,375 ڈالر فی اونس کی اہم رکاوٹ توڑ دی ہے اور امکان ہے کہ یہ 4,427 ڈالر فی اونس تک مزید بڑھ جائے۔

روایتی طور پر محفوظ سرمایہ کاری کے اثاثے کے طور پر دیکھا جانے والا سونا جغرافیائی و سیاسی اور تجارتی تناؤ، مرکزی بینکوں کی مسلسل خریداری اور آئندہ سال شرحِ سود میں کمی کی توقعات کی بدولت مستحکم رہا۔

سرمایہ کار اس وقت 2026 میں امریکی شرحِ سود میں ممکنہ دو کٹوتیوں کے امکانات کو مدنظر رکھتے ہوئے فیصلے کر رہے ہیں، جس کی وجہ سے بغیر کسی منافع (سود) کے حامل سونے کی کشش میں اضافہ ہو رہا ہے۔