ادارہ شماریات کی رپورٹ کے مطابق موجودہ مالی سال کے پہلے چار ماہ میں پاکستان کی بڑی صنعتوں کی کارکردگی میں بہتری آئی ہے۔ رپورٹ کے مطابق صرف اکتوبرکے دوران لارج اسکیل مینوفیکچرنگ (ایل ایس ایم) سیکٹر کی پیدوار میں سالانہ بنیاد پر 8.33 فیصد کا شاندار اضافہ ریکارڈ کیا گیا جبکہ ماہانہ بنیاد پر اس میں 3.75 فیصد اضافہ ہوا۔

ایل ایس ایم سیکٹر کے کوانٹم انڈیکس نمبرز میں ان کے وزن کے مطابق مجموعی طور پر 5.02 فیصد کی شرح نمو میں اہم حصہ ڈالنے والے شعبے درج ذیل ہیں:آٹوموبائلز (1.82)، پٹرولیم مصنوعات (0.89)، گارمنٹس (0.83)، سیمنٹ (0.83)، اور خوراک (0.66) نے مثبت رجحان میں سب سے زیادہ حصہ ڈالا جب کہ اس کے برعکس فارماسیوٹیکل (منفی 0.43)، فرنیچر (منفی 0.26)، کیمیکلز (منفی 0.16) اور آئرن و اسٹیل (منفی 0.15) کی کارکردگی منفی رہی۔

جولائی تا اکتوبر 25-2024 کے مقابلے میں جولائی تا اکتوبر 26-2025 کے دوران خوراک، مشروبات، تمباکو، ٹیکسٹائل، ملبوسات ، چمڑے کی مصنوعات، پیپر اینڈ بورڈ، کوک اور پٹرولیم مصنوعات، ربڑ کی مصنوعات، غیر دھاتی معدنی مصنوعات، فیبریکیٹڈ میٹل، کمپیوٹر، الیکٹرانکس اور آپٹیکل مصنوعات، الیکٹریکل آلات، آٹوموبائلز، اور دیگر ٹرانسپورٹ آلات میں اضافہ ریکارڈ کیا گیا۔

دوسری جانب، لکڑی کی مصنوعات، کیمیکلز، دواسازی، لوہا و اسٹیل مصنوعات، مشینری و آلات، اور فرنیچر کی پیداوار میں کمی دیکھی گئی۔

ماہرین کا خیال ہے کہ اس متاثر کن مجموعی گروتھ کی سب سے بڑی وجہ آٹوموبائل سیکٹر کی غیر معمولی کارکردگی ہے جس نے اکتوبر میں سالانہ بنیاد پر 79 فیصد کا بڑا اضافہ ریکارڈ کیا۔ ان کا یہ بھی کہنا ہے کہ اگرچہ برآمدات میں کمی کا رجحان ہے لیکن مقامی مینوفیکچرنگ سیکٹر میں مقامی طور پر تیار کردہ اشیاء کی مانگ میں اضافے کی وجہ سے مضبوط نمو دیکھی جارہی ہے۔ ماہرین کے مطابق، ڈالر کی بلند شرح کی وجہ سے اکثر درآمدی اشیاء عوام کی پہنچ سے باہر ہوچکی ہیں جس نے مقامی صنعت کو پنپنے کا موقع دیا ہے۔

رواں مالی سال کے پہلے پانچ ماہ میں برآمدات 14.54 فیصد کمی کے ساتھ 12.87 ارب ڈالر رہیں جبکہ گزشتہ سال اسی عرصے میں یہ 13.72 ارب ڈالر تھیں۔

کاپی رائٹ بزنس ریکارڈر 2025